Oʻzbekiston Mudofaa vazirligi Tolibon vertolyoti urib tushirilgani haqidagi maʼlumotni rad etdi
Oʻzbekiston va Afgʻoniston chegarasida afgʻon harbiy vertolyoti urib tushirilgani haqidagi maʼlumot yolgʻon, deb xabar berdi Mudofaa vazirligi matbuot xizmati.
Ijtimoiy tarmoqlarda Afgʻoniston qurolli kuchlariga tegishli Mi-17 vertolyoti Oʻzbekiston tomonidan urib tushirilgani haqida maʼlumot tarqalgan edi.
Oʻzbekiston Mudofaa vazirligi ommaviy axborot vositalari va ijtimoiy tarmoqlar foydalanuvchilarini faqat rasmiy maʼlumotlarga tayanishga chaqirdi.
Eslatib oʻtamiz, 2021-yilda prezident Ashraf Gʻani hukumati qulaganidan keyin toliblar Rossiya va Amerikada ishlab chiqarilgan Mi-17 va Sikorsky UH-60 vertolyotlarini olgan.
Mi-17 vertolyoti Mi-8 harbiy transport vertolyotining navbatdagi modifikatsiyasi hisoblanadi. Uskunalar Qozon vertolyot zavodi va Ulan-Udedagi aviatsiya zavodida ishlab chiqariladi.
Avvalroq «Kursiv» 2022-yil avgustida Tolibon Oʻzbekiston va Tojikistonni Afgʻonistonning avvalgi hukumati samolyotlarini qaytarishga chaqirgani haqida xabar bergan edi.
