Interpol orqali qidiruvda bo‘lgan uch kishi O‘zbekistonga qaytarildi

Turkiyada yashirinib yurgan, Interpol orqali xalqaro qidiruvda bo‘lgan uch nafar shaxs O‘zbekistonga ekstraditsiya qilindi. Ichki ishlar vazirligiga ko‘ra, ular jinsiy zo‘ravonlik va firibgarlik bilan bog‘liq jinoyatlarda ayblanmoqda.

Qidiruvdagi shaxslar Istanbulda ushlangan

Interpolning O‘zbekistondagi Milliy markaziy byurosi Turkiya huquqni muhofaza qiluvchi organlari hamda O‘zbekistonning Istanbuldagi Bosh konsulxonasi bilan hamkorlikda tezkor-qidiruv tadbirlarini o‘tkazdi.

Tadbirlar davomida Turkiyaning Istanbul shahrida yashirinib yurgan uch nafar xalqaro qidiruvdagi shaxsning manzili aniqlanib, ular qo‘lga olindi.

Ular turli jinoyatlarda ayblanmoqda

Ma’lumotga ko‘ra, qo‘lga olinganlardan biri Samarqand viloyatida tug‘ilgan 28 yoshli shaxs bo‘lib, u jinsiy zo‘ravonlik bilan bog‘liq og‘ir jinoyatni sodir etganlikda ayblanib xalqaro qidiruvga berilgan.

Buxoro viloyatida tug‘ilgan 34 yoshli shaxs esa firibgarlik jinoyatini sodir etganlikda ayblanib qidiruvda bo‘lgan.

Yana bir holatda Toshkent shahrida tug‘ilgan 50 yoshli shaxs yirik miqdordagi firibgarlik jinoyatini sodir etganlikda ayblanib xalqaro qidiruvga e’lon qilingan.

Ular O‘zbekistonga olib kelindi

Qo‘lga olingan shaxslar belgilangan tartibda O‘zbekistonga olib kelinib, tegishli huquqni muhofaza qiluvchi organlarga topshirildi.

Interpolning O‘zbekistondagi Milliy markaziy byurosi xalqaro hamkorlik mexanizmlaridan foydalangan holda transmilliy jinoyatchilikka qarshi kurashish va qidiruvdagi shaxslarni javobgarlikka tortish ishlari davom ettirilishini bildirdi.

Eslatib o‘tamiz, avvalroq Ichki ishlar vazirligi Ravshan Zolotoy nomi bilan tanilgan Ravshan Muhitdinovga nisbatan xalqaro qidiruv bekor qilinganiga izoh bergandi.