Vivo yangi flagman simsiz quloqchinlari TWS 5 Pro’ni taqdim etdi. Unda yuqori sifatli audio, kuchli shovqinni bekor qilish va sun’iy intellekt funksiyalari jamlandi.
Ikki drayverli audio tizimi va Wi-Fi orqali ovoz uzatish
Qurilma vivo va Knowles hamkorligida ishlab chiqilgan miniatyura balanslangan armatura drayveri hamda kompaniyaning o‘ziga tegishli ikki halqali dinamik drayver bilan jihozlangan. Koaksial akustik arxitektura yuqori va past chastotalarning uyg‘un ishlashini ta’minlaydi. Kompaniya ma’lumotiga ko‘ra, quloqchin 16 Gtsdan 60 kGtsgacha bo‘lgan chastotalarni qamrab oladi.
Audio tizimida Cirrus Logic bilan hamkorlikda ishlab chiqilgan Hi-Fi DAC ishlatilgan bo‘lib, u 113 dB dinamik diapazonni ta’minlaydi. Shuningdek, qurilma 96 kGs/24 bit sifatdagi audioni tabiiy ko‘rinishda ijro eta oladi va Wi-Fi orqali 4,6 Mbit/s tezlikda yo‘qotishsiz ovoz uzatishni qo‘llab-quvvatlaydi. LE Audio, ISOC arxitekturasi va LC3 kodeki tufayli kechikish 42 millisekundgacha kamaytirilgan.
Shovqinni bekor qilish va qo‘ng‘iroqlar sifati yaxshilangan
TWS 5 Pro to‘rtta mikrofon, Deep Sea Smart Noise Cancellation 2.0 texnologiyasi va 60 dBgacha faol shovqinni bekor qilish tizimi bilan jihozlangan. Qurilma 5500 Gts diapazonida ishlaydi va kundalik shovqinlarning 99,9 foizigacha bostirishi aytilmoqda. Samolyot, metro va avtobus uchun alohida ANC rejimlari, shaffof eshitish, uyqu va immersiv tinglash rejimlari ham mavjud.
Ovozli qo‘ng‘iroqlar uchun suyak orqali tovushni qabul qiluvchi VPU mikrofoni o‘rnatilgan. U tashqi muhitdagi shovqinni 100 dBgacha, shamol shovqinini esa 99 foizgacha kamaytirishga yordam beradi.
Batareya va qo‘shimcha imkoniyatlar
Quloqchin bir vaqtning o‘zida uchta qurilmaga ulanishni qo‘llab-quvvatlaydi. Bosimni sezuvchi sensorli boshqaruv orqali musiqa ijrosi, qo‘ng‘iroqlar, shovqinni bekor qilish rejimlari va ovoz balandligini boshqarish mumkin. Qurilma IP54 standarti bo‘yicha chang va suv sachrashidan himoyalangan.
TWS 5 Pro simsiz va tezkor quvvatlashni qo‘llab-quvvatlaydi. Atigi 5 daqiqalik quvvatlash 2 soatgacha musiqa tinglash imkonini beradi. Batareya Wi-Fi rejimida 5 soatgacha, AAC Bluetooth rejimida esa 11 soatgacha ishlaydi. Zaryadlash g‘ilofi bilan umumiy ishlash vaqti 50 soatga yetadi.
Sun’iy intellekt va multimedia funksiyalari
Yangi model Hi-Res Audio Wireless sertifikati, fazoviy audio, tinglash muhitiga moslashuvchi ovoz, shaxsiy audio profillari va 10 diapazonli ekvalayzer bilan ta’minlangan. Shuningdek, aqlli tarjima, dialoglarni tarjima qilish, SI asosidagi ovozli bildirishnomalar, simsiz karaoke rejimi, masofadan kamera boshqaruvi, ovozli buyruqlar, quloqchinni taqishni aniqlash, uzoq vaqt foydalanish haqida eslatma va yo‘qolgan quloqchinni topish funksiyalari ham mavjud.
Eslatib o‘tamiz, avvalroq Sony WH-1000X The ColleXion quloqchinlari haqida yozgan edik.
