Realme kompaniyasi tomonidan yangi Realme P4s 5G smartfoni rasman taqdim etildi. Bu haqda Gizmochina texnologiyalar nashri xabar bermoqda.
Modelning asosiy xususiyatlari qatoriga 8 000 mA/soat sig‘imli batareya, 144 Hz yangilanish chastotasiga ega AMOLED ekran, 50 MP asosiy kamera hamda MediaTek Dimensity 7 400 Ultra protsessori kiradi.
Yangi qurilmada avtonom ishlash va unumdorlikka alohida urg‘u berilgan. Shu bilan birga, smartfon IP66, IP68 va IP69 standartlari bo‘yicha suv va changdan himoyalangan.
8 000 mA·soat batareya va 80 Vt quvvatlash
Realme P4s 5G 8 000 mA/soat sig‘imli katta batareya bilan jihozlangan. Shunga qaramay, korpus qalinligi 8,6 mm, og‘irligi esa 208 grammni tashkil etadi.
Smartfon 80 Vt quvvatli simli tezkor quvvatlashni qo‘llab-quvvatlaydi. Bundan tashqari, teskari quvvatlash funksiyasi ham mavjud.
Modelda bypass charging rejimi ham qo‘llanilgan. Ushbu funksiya, masalan, o‘yin vaqtida elektr energiyasini batareyani doimiy ravishda quvvatlash o‘rniga bevosita tizim platasiga yo‘naltiradi. Bu esa batareyaning qizishini kamaytirishga yordam beradi.
Ekran 144 Gts chastotada ishlaydi
Realme P4s 5G Samsung tomonidan ishlab chiqarilgan 6,78 dyuymli AMOLED displeyga ega. Ekran 1,5K aniqlik va 144 Hzgacha yangilanish chastotasini qo‘llab-quvvatlaydi.
Displeyning maksimal yorqinligi 1 000 nitga yetadi. Shuningdek, yuqori yorqinlikda DC dimming texnologiyasi ko‘zga tushadigan miltillashni kamaytirishga xizmat qiladi.
Qurilma tasvir silliqligini oshirish uchun Hyper Vision+ AI chipidan ham foydalanadi. Qo‘llab-quvvatlanadigan o‘yinlarda tizim qo‘shimcha kadrlar yaratib, tasvir harakatini yanada ravonlashtirishi mumkin.
Dimensity 7 400 Ultra protsessori o‘rnatildi
Smartfonning ishlashi MediaTek Dimensity 7 400 Ultra protsessoriga asoslangan. Qurilma 12 GBgacha tezkor xotira va 256 GBgacha ichki xotira bilan taklif qilinadi.
Yuqori yuklama paytida haroratni nazorat qilish uchun 7 000 kvadrat millimetr maydonga ega bug‘ kamerali sovitish tizimi qo‘llanilgan.
Realme yangi modelni nafaqat kundalik foydalanish, balki mobil o‘yinlar va yuqori unumdorlik talab qiladigan vazifalar uchun ham mo‘ljallagan.
Asosiy kamera 50 MP va optik stabilizatsiyaga ega
Realme P4s 5G’ning asosiy kamerasi 50 MP aniqlikka ega va optik tasvir stabilizatsiyasini qo‘llab-quvvatlaydi.
Unga qo‘shimcha ravishda 8 MP ultra keng burchakli kamera o‘rnatilgan. Selfi va videoqo‘ng‘iroqlar uchun esa 16 MP old kamera xizmat qiladi.
Optik stabilizatsiya suratga olishda qo‘l titrashining ta’sirini kamaytirishga, ayniqsa, kam yorug‘lik sharoitida tasvir sifatini yaxshilashga yordam beradi.
Eslatib o‘tamiz, Kursiv Uzbekistan nashri iyul oyi uchun eng kuchli Android smartfonlari e’lon qilingani haqida yozgan edi.
