Yevropa Ittifoqi Oʻzbekistonning yana bir kompaniyasini sanksiyalar ro‘yxatiga kiritdi
Yevropa Ittifoqi rasmiy jurnalida keltirilgan maʼlumotlarga koʻra, Oʻzbekistonning Mvizion kompaniyasi sanksiyalar roʻyxatiga kiritilgan.
Korxonalar va tashkilotlarning yagona davlat reestriga koʻra, kompaniya 2022-yil iyun oyida roʻyxatga olingan. Korxonaning ustav kapitali 1 mln soʻmni tashkil qiladi. Kompaniyaning yagona taʼsischisi esa Igor Ivlev.
Mvizion elektron va telekommunikatsiya uskunalari ulgurji savdosi bilan shugʻullanadi.
Oʻtgan yilning yozda Bryussel Oʻzbekistonning ikki kompaniyasi – Alfa Beta Creative va GFK Logistics Asiani qora roʻyxatga kiritgan edi.
Eslatib oʻtamiz, Mvizion 2023-yildan beri Buyuk Britaniya va AQShning sanksiyalari roʻyxatida.
Avvalroq «Kursiv» Amerika rasmiylari asli oʻzbekistonlik Maksim Zagornov va Polar Star Logistics kompaniyasining mamlakatimizdagi vakolatxonasiga nisbatan sanksiyalar qoʻygani haqida maʼlum qilgan edi.
