NATO yadro qurolini jangovar shay holatga keltirishni muhokama qilmoqda

NATOga a’zo davlatlar koʻproq yadroviy qurollarni joylashtirish va ularni jangovar holatga keltirish boʻyicha muzokaralar olib bormoqda. Bu haqda mudofaa ittifoqi bosh kotibi Yens Stoltenberg ma’lum qildi.

Stoltenbergning soʻzlariga koʻra, bunga Rossiya va Xitoydan tahdidlar sabab boʻlgan. Shuningdek, bosh kotib mudofaa Alyansi yadroviy qurolsiz dunyoga intilishi, lekin u mavjud ekan, NATO yadroviy ittifoq boʻlib qolishini ta’kidladi.

2023-yil iyun oyida Stokgolm xalqaro tinchlik tadqiqot instituti (SIPRI) oʻsha yil boshida yadro jangovar komplektning zaxirasi 12,5 mingdan oshganini ma’lum qilgan edi.

Jangovar komplektning asosiy qismi – taxminan 90 foizi AQSH va Rossiyadan keladi. NATOga a’zo Buyuk Britaniya, AQSH va Fransiya yadro quroliga ega.

Avvalroq «Kursiv» joriy yil boshida Shimoliy Koreya suv osti yadro qurolini sinovdan oʻtkazgani haqida xabar bergan edi.