Prezident Navbahor tumanidagi politexnikum faoliyati bilan tanishdi – video

Shavkat Mirziyoyev Navoiy viloyati Navbahor tumanidagi politexnikumda bo‘lib, hududdagi bandlik masalalariga e’tibor qaratdi. Bu haqda davlat rahbari matbuot xizmati ma’lum qildi.

Unga ko‘ra, hozirda Navoiy viloyatida 25 ta professional ta’lim muassasasida 12 ming fuqaro ta’lim olmoqda. Ularga 234 nafar ishlab chiqarish ustalari malaka oshirishda ko‘maklashmoqda.

2-son politexnikumda zamonaviy o‘quv va laboratoriya xonalari, sport zallari, yotoqxona va oshxona mavjud. Yirik sanoat korxonalari, jumladan, Navoiy kon-metallurgiya kombinati va «Navoiyazot», yoshlarni maqsadli tayyorlashda muhim rol o‘ynaydi. Texnikumda o‘quvchilar nafaqat kasb o‘rganadi, balki ish haqi ham oladilar.

Prezident, xotin-qizlar bilan suhbatda, ularga o‘z kasbini puxta egallash va hayotda o‘z o‘rnini topishlarini tavsiya qildi.

Shuningdek, nogironligi bo‘lgan shaxslar uchun milliy hunarmandchilik buyumlarini yasash o‘rgatilmoqda. Ta’lim muassasalari 51 ta korxona bilan shartnoma imzolagan va yil boshidan buyon mingdan ziyod ishsiz fuqarolarni o‘qitib kelmoqda.

Eslatib o‘tamiz, avvalroq Prezident «Yangi Navoiy» shaharchasi qurilishi bilan tanishgan edi.