Xotin-qizlar yetakchiligi: «Tenglar orasida birinchi» mukofoti bo‘yicha marosim bugun bo‘lib o‘tadi

Bugun soat 18:00 da Hyatt Regency Toshkent mehmonxonasida xotin-qizlar yetakchiligi bo‘yicha «Tenglar orasida birinchi» xalqaro mukofotini topshirish marosimi bo‘lib o‘tadi. Mazkur tadbirni «Kursiv» biznes nashri Osiyo taraqqiyot banki (OTB) va Coca-Cola kompaniyasi koʻmagida tashkil etildi.

Mukofot Markaziy Osiyo mamlakatlarida xotin-qizlar yetakchiligi g‘oyalarini rivojlantirishga hissa qo‘shayotgan yetakchi ayollar, tadbirkorlar, faollar, shuningdek, tashkilot va loyihalarning xizmatlarini e’tirof etishga qaratilgan. Ayollar yetakchiligining yangi shaxslarini izlab topish, ayollar yetakchilik madaniyatini shakllantirish, xotin-qizlar o‘rtasida ta’limni ommalashtirish va jamiyatda stereotiplarga qarshi kurashishga alohida e’tibor qaratildi.

Marosim doirasida qishloq xoʻjaligi, qurilish, sanoat, axborot texnologiyalari, tadbirkorlik, ommaviy axborot vositalari, fan sohalaridagi yutuqlar, shuningdek, ayollarni qoʻllab-quvvatlovchi eng yaxshi xalqaro tashabbuslar va korporativ loyihalar taqdirlanadi.

Ushbu tadbir har yili jamoatchilik e’tiborini jalb qilib, Markaziy Osiyo ayollarini yangi yutuqlarga ilhomlantirib, gender tenglikni targ‘ib qilishga hissa qo‘shadi.

Eslatib o‘tamiz, o‘tgan yili ham «Kursiv» ayollar yetakchiligi sohasidagi mukofotlarni topshirgan edi.