Saudiya Arabistonida IT Park Uzbekistan vakolatxonasi ochildi

16-dekabr kuni Saudiya Arabistonining Ar-Riyod shahrida IT Park Uzbekistan vakolatxonasi rasman ochildi. Bu haqda texnoklaster axborot xizmati xabar berdi.

Tadbir The Garage innovatsion maydonida Plug and Play Riyadh ko‘magida tashkil etildi. IT Park Bosh direktori Farhod Ibragimov o‘z nutqida ushbu vakolatxona yangi imkoniyatlar eshigini ochishini ta’kidladi.

Tadbir davomida mehmonlar O‘zbekiston IT-sektorining rivojlanish strategiyalari, startap ekotizimi va biznesni qo‘llab-quvvatlash dasturlari bilan tanishdi. Ushbu tashabbus O‘zbekistonning startap ekotizimini xalqaro darajada namoyish etishga va xorijiy investitsiyalarni jalb qilishga qaratilgan.

Saudiya Arabistonidagi vakolatxona O‘zbekiston va Ko‘rfaz davlatlari o‘rtasidagi hamkorlikni rivojlantirish uchun yangi imkoniyatlar yaratadi. U Markaziy Osiyo va Fors ko‘rfazi bozorlariga kirishni osonlashtirish, istiqbolli startaplarni dastlabki bosqichda qo‘llab-quvvatlash hamda kompaniyalarning xarajatlarini qisqartirishga xizmat qilishi kutilmoqda.

Bundan tashqari, DataVolt kompaniyasi ishtirokida Green Data Centers qurilishi bo‘yicha $5 milliardlik qo‘shma loyiha ham rejalashtirilgan.

Avvalroq Kursiv Uzbekistan joriy yinling noyabr oyida 112 ta kompaniya IT Park rezidenti bo‘lgani haqida yozgan edi.