Сhet el valyutasida obligatsiyalar O‘zbekistonda sotiladi: yangi qonun loyihasi muhokamaga qo‘yildi
O‘zbekiston kapital bozorini yanada rivojlantirishga qaratilgan qonun loyihasi muhokamaga qo‘yildi. Unda «Tartibga solish qumdoni» maxsus huquqiy rejimi orqali yangi investitsiya imkoniyatlarini joriy etish, mahalliy va xorijiy investorlar uchun sharoitlarni yaxshilashga doir chora-tadbirlar belgilangan.
«Tartibga solish qumdoni»ning yangi imkoniyatlari
Mazkur qonun loyihasiga ko‘ra, ushbu maxsus rejim cheklanmagan muddatga joriy etiladi. Bu rejim doirasida mahalliy yuridik shaxslar ham «Tartibga solish qumdoni»da qatnashuvchi maqomini olishlari mumkin, ammo so‘nggi ikki yil ichida majburiyatlarini bajarmagan yoki tartibga soluvchi organ tomonidan jazolangan kompaniyalar bundan mustasno.
«Tartibga solish qumdoni» doirasida mahalliy va xorijiy investorlarga qimmatli qog‘ozlar bilan savdo qilish, jumladan, xalqaro kompaniyalar obligatsiyalari, davlat obligatsiyalari va birja fondlariga (ETF) sarmoya kiritish imkoniyati taqdim etiladi. Bundan tashqari, xalqaro moliya institutlariga milliy valyutada obligatsiyalar chiqarish huquqi beriladi.
Xorijiy valyutadagi obligatsiyalar
Xorijiy valyutada chiqarilgan obligatsiyalarni birjalar platformasida joylashtirish va muomalada bo‘lish uchun maxsus platformalar tashkil etiladi. Shuningdek, yuridik shaxslarga qimmatli qog‘ozlar bo‘yicha majburiyatlarni bajarish maqsadida chet el valyutasini xarid qilish huquqi beriladi.
«Oʻzbekiston Respublikasi rezident va norezident emitentlarning xorijiy valyutasidagi obligatsiyalarini joylashtirish va muomalada boʻlishi boʻyicha tegishli fond birjalarda maxsus platforma yaratiladi», – deyiladi qonun loyihasida.
Avvalroq Kursiv Uzbekistan nega ekspertlar chet el valyutasida obligatsiyalar chiqarishni taklif qilayotgani haqida batafsilroq yozgan edi. Buning sabablaridan biri, agar obligatsiyalar so‘mga chiqarilgan bo‘lsa, xorijiy investorlar uchun risklarni baholash qiyin.
Investitsiya fondlarini rivojlantirishga qaratilgan qadamlar
2025-yil 1-mayga qadar investitsiya fondlari, jumladan, ko‘chmas mulk va birja fondlarini tashkil etish va ularni tartibga solish bo‘yicha hujjatlar ishlab chiqiladi.
O‘zbekiston kapital bozorini yanada rivojlantirishga qaratilgan yangi qonun loyihasi 28-yanvarga qadar ommaviy muhokamada bo‘ladi. Fuqarolar ushbu loyiha bo‘yicha o‘z fikr va takliflarini qoldirish imkoniyatiga ega.
Avvalroq Kursiv Uzbekistan nega ekspertlar O‘zbekistonda birjada chet el aksiyalarini sotishga ruxsat berish tarafdori ekani haqida yozgan edi.
