Oʻzbekistonda bitta boʻsh ish oʻrniga 14 nafar talabgor toʻgʻri kelmoqda – HeadHunter

Oʻzbekistonda 2024-yilda hh.uz platformasida bitta boʻsh ish oʻrni uchun oʻrtacha 14 nafar talabgor toʻgʻri keldi. Yil davomida talabgorlar raqobati 44 foizga oshdi, deb xabar berdi HeadHunter (sharh Kursiv Uzbekistanʼda mavjud).

Ma’lum qilinishicha, yil davomida ish beruvchilar platformada 130 mingta faol boʻsh ish oʻrinlarini joylashtirdi. Yil davomida ularning soni 28 foizga oshdi.

Ish beruvchilarning eng faol davri may oyidan oktabr oyigacha boʻlgan davrga toʻgʻri keldi. Oktabr oyida oʻzbekistonlik ish beruvchilar 18 mingga yaqin boʻsh ish oʻrinlarini joylashtirdi. 2024-yilning yanvar va dekabr oylarida platformada eng kam ish taklif qilingan.

Eng koʻp boʻsh ish oʻrinlari savdo va mijozlarga xizmat koʻrsatishga toʻgʻri kelib, ular barcha takliflarning 18,3 foizini tashkil etdi. Ikkinchi oʻrinni 13,8 foiz ulush bilan marketing, reklama va PR egalladi. Yana 9,7 foiz e’lonlarda ish beruvchilar sport klublari va goʻzallik salonlari uchun xodimlarni qidirgan.

Boʻsh ish oʻrinlari sonining sezilarli oʻsishi sugʻurta sohasida sodir boʻlib, 2023-yil koʻrsatkichlariga nisbatan 89 foizga oshdi. Bundan tashqari, chakana savdo xodimlari, ta’lim va ilmiy tashkilotlar xodimlari ancha tez-tez izlana boshladi. Xodimlarga boʻlgan talab konsalting, xavfsizlik va avtomobil biznesida deyarli oʻzgarmadi.

Taklif etilayotgan oʻrtacha ish haqi 2024-yilda 17 foizga oshib, 6,6 mln soʻmni tashkil etdi. Avvalgidek, yetakchilikda oliy va oʻrta menejment boʻlib, u yerda talabgorlarga 11,7 million soʻm taklif qilinmoqda. Shunga qaramay bu koʻrsatkich atigi 2 foizga oshdi.

2023-yilga nisbatan xavfsizlik sohasida (47 foiz), ishchi kasblar sohasida (45 foiz), transport va logistika sohasida (34 foiz) oʻrtacha taklif etilayotgan ish haqi oldinga siljidi. Ish haqining sezilarli darajada pasayishi sugʻurta sohasida sodir boʻlib, oʻrtacha ish haqi 37 foizga – 5 million soʻmga tushdi.

2024-yilda talabgorlarning faolligi 84 foizga oshib, 1,4 million faol rezyumega yetdi. Oʻzbekistonliklarning ishchi kasblari, sugʻurta, transport va logistika, shuningdek, avtomobil biznesiga qiziqishi keskin oshdi. Bu yoʻnalishlar rezyumening ikki baravar oʻsishini koʻrsatdi.

Ayniqsa, ish izlovchilar, xavfsizlik, transport va logistika boʻyicha mutaxassislar oʻrtasida raqobat kuchaydi. IT-raqobat yil davomida oʻrtacha 15 foizga oʻsishni koʻrsatdi.

Avvalroq Kursiv Uzbekistan Rossiyadagi xorijiy mutaxassislarga qancha maosh toʻlanishi haqida xabar bergan edi.