Yandex Go’da tashkilotlarni izlash va tanlash uchun Joylar xizmati ishga tushirildi

Yandex Go ilovasida Toshkent shahri uchun moʻljallangan Joylar xizmati ishga tushdi. Bu haqda Kursiv Uzbekistanʼga kompaniya ma’lum qildi.

Ta’kidlanishicha, bu xizmat foydalanuvchilarga restoranlar, doʻkonlar, goʻzallik salonlari, sport va koʻngilochar maskanlarni qulay izlash, baholash va ularga buyurtma berish imkonini taqdim etadi.

Xizmatda tashkilotlarni toifalar boʻyicha saralash, ularning reytingi, ish vaqti va wi-fi mavjudligi boʻyicha filtrlash mumkin. Shuningdek, taniqli joylar tanlovi ham mavjud boʻlib, foydalanuvchilar yangi maskanlarni kashf etishi mumkin.

Tashkilot profilida rasmlar, foydalanuvchi baholari va sharhlar aks etadi. Shundan soʻng xizmatga yozilish yoki administrator bilan bogʻlanish, hatto ilovadan chiqmasdan taksi chaqirish imkoniyati mavjud.

Hozircha xizmat faqat Toshkentda mavjud, kelgusida esa Oʻzbekistonning barcha hududida ishga tushirilishi rejalashtirilgan. Xizmatdan foydalanishni boshlash uchun Google Play Market yoki App Store orqali Yandex Go ilovasini yangilash kerak.

Avvalroq «Kursiv» Yandex Uzbekistan kuryerlar uchun sugʻurta dasturini ishga tushirgani haqida xabar bergan edi.