Malayziya kompaniyasi O‘zbekistonda dronlar bo‘yicha innovatsion xizmatlarni yo‘lga qo‘yadi

Malayziyaning Aerodyne kompaniyasi rahbari Kamarul Muhammad O‘zbekiston sharoitiga mos zamonaviy dronlarni ishlab chiqishga tayyorligini ma’lum qildi. Bu haqda «Dunyo» axborot agentligi xabar qildi.

Kompaniya dunyo bo‘ylab dron xizmatlarini taqdim etuvchi yetakchi tashkilotlardan biri sifatida tan olingan. Drone Industry Insights tomonidan 2021 – 2023-yillarda eng yaxshi dron xizmatlarini ko‘rsatuvchi kompaniya sifatida e’tirof etilgan bu kompaniya innovatsion yondashuv va sun’iy intellekt dasturlaridan samarali foydalanishi bilan ajralib turadi.

Kompaniya rahbari O‘zbekiston sharoitiga mos zamonaviy dronlarni ishlab chiqishga va shuningdek, qishloq xo‘jaligi maqsadlarida dron xizmatlarini yo‘lga qo‘yishga tayyorligini bildirdi.

Shuningdek, kompaniya mahalliy hamkorlar bilan birgalikda dronlarni boshqarish va ularning dasturiy ta’minotini ishlab chiqadigan malakali mutaxassislarni tayyorlovchi trening markazini ishga tushirishni ham rejalashtirmoqda.

Ma’lumot uchun, 2014-yilda Kamarul Muhammad tomonidan asos solingan Aerodyne Group hozirgi kunda dunyoning 45 ta davlatida faoliyat yuritadi va sakkizta mamlakatda filiallarini ochgan. Kompaniya 800 dan ortiq dronlar parkiga ega bo‘lib, turli maqsadlar uchun dron xizmatlarini ko‘rsatmoqda.

Avvalroq Kursiv Uzbekistan Malayziya kompaniyasi respublikada elektr skuterlar ishlab chiqarishi haqida yozgandi.