«Xottabich» muzqaymog‘i sanitariya talablariga mos kelmagani tasdiqlandi

«X Xasanboy va xolod» MCHJ iste’molchilarga sifatsiz mahsulot sotilganligi uchun 64 mln so‘m pul mablag‘ini qaytaradi. Bu haqda Raqobat qo‘mitasi xabar berdi.

Qo‘mita tomonidan o‘tgan yilning 15-avgustida o‘tkazilgan nazorat xaridi tadbirida «X Xasanboy va xolod» MCHJ tomonidan ishlab chiqarilgan «Xottabich» nomli muzqaymoq sanitariya-epidemiologik talablariga javob bermasligi aniqlangandi.

Mazkur mahsulot SanPin va «Oziq-ovqat xavfsizligi uchun gigiyena qoidalari»ga zid ekani tasdiqlangan. Kompaniyaning o‘zi ham mahsulot sifatini baholash uchun ekspertiza o‘tkazgan va natijalar belgilangan standartlarga mos kelmasligini ko‘rsatgan.

Shu sababli 2024-yil oktabr oyida qo‘mita tomonidan kompaniyaga qonunbuzarlikni bartaraf etish bo‘yicha tegishli ko‘rsatma berilgan. Kompaniya esa ushbu qarorni haqiqiy emas, deb topish uchun sudga murojaat qilgan. Biroq shu yilning fevral oyida Toshkent tumanlararo ma’muriy sudi da’vo arizasini rad etdi va Raqobat qo‘mitasining qarorini o‘z kuchida qoldirdi.

Shuningdek, kompaniya iste’molchilarga sifatsiz mahsulot sotilgani uchun 64 mln so‘m pul mablag‘ini qaytaradi.

Avvalroq Kursiv Uzbekistan Raqobat qo‘mitasi tomonidan «Halol Bozor» nomi noqonuniy deb topilgani haqida yozgandi.