«Open budjet»da qaysi loyihalar ko‘proq moliyalashtirildi

«Tashabbusli budjet»ning birinchi mavsumida 964 ta yo‘llarni ta’mirlash uchun loyihalarga 1,4 mlrd so‘mga yaqin mablag‘ ajratildi. Bu haqda Iqtisodiyot va moliya vazirligi xabar berdi.

Bu yil «Tashabbusli budjet» loyihasining birinchi mavsumiga ovoz berish jarayoni 11-martdan 20-mart kunigacha davom etdi. Bu bosqichda butun respublika bo‘ylab fuqarolar tomonidan jami 10,45 mln ovoz berilgan. Yakuniy natijalarga ko‘ra, g‘olib deb topilganlarga 2,4 mingta loyihaga qariyb 3,2 trln so‘m mablag‘ ajratilgan.

Eng ko‘p mablag‘ ichki yo‘llarni ta’mirlash bilan bog‘liq 964 ta loyihaga taqsimlandi – 1,4 mlrd so‘m. Shuningdek, maktablarni ta’mirlash va moddiy-texnika bazasini rivojlantirish uchun 699 ta loyihaga 875 mlrd so‘m, tibbiyot muassasalarini ta’mirlash va texnik bazasini yaxshilash uchun esa 247 ta g‘olibga 329 mlrd so‘m ajratildi. Boshqa sohalardagi 321 ta loyiha esa 415 mlrd so‘mni qo‘lga kiritdi.

Shu bilan birga, eng kam mablag‘ ichimlik va oqova tizimini yaxshilash bilan bog‘liq, 34 ta loyihaga 49 mlrd so‘m to‘g‘ri keldi. Bunda bog‘chalarni ta’mirlashga 60 ta loyihaga 72 mlrd so‘m, transformatorlar va simyog‘ochlar o‘rnatishga esa 44 ta g‘olibga 52 mlrd so‘m ajratilgan.

Ma’lumot uchun, 2024-yilda «Tashabbusli budjet» jarayonining 1-mavsumida respublika bo‘ylab 2,25 mingta mahalla bo‘yicha jami 2,77 mingta loyiha g‘olib deb topilgandi. Ularni moliyalashtirish uchun mahalliy budjetlardan 3,3 trln so‘m ajratilgan. Ovoz berishda respublikaning 11,7 mln fuqarosi ishtirok etgan.

Avvalroq Kursiv Uzbekistan «Tashabbusli budjet»da majburiy ovoz to‘plangan loyihalar chetlatilishi haqida yozgandi.