Tramp qurol eksportini oshirishga qaratilgan farmonni tayyorlamoqda

AQSh prezidenti Donald Tramp ma’muriyati harbiy texnika eksportini osonlashtiruvchi ijroiya farmonni tayyorlamoqda. U seshanba yoki chorshanba kuni e’lon qilinishi kutilmoqda, deya xabar berdi Reuters.

Unga ko‘ra, bu farmon AQShning yirik mudofaa kompaniyalari – Lockheed Martin, RTX Corp va Boeing savdolarini oshirishi mumkin. Hujjat AQSh Qurol eksporti nazorati qonunini o‘zgartirib, qurol savdosi bo‘yicha Kongress ko‘rib chiqishi shart bo‘lgan minimal miqdorni oshirishni nazarda tutadi.

Tramp birinchi prezidentlik davrida Kongressning qurol savdosi bo‘yicha cheklovlaridan norozi bo‘lgan edi. 2019-yilda u favqulodda holat e’lon qilib, Saudiya Arabistoni, BAA va Iordaniyaga Kongress ruxsatisiz $8 mlrddan ortiq qurol sotgan edi.

Eslatib o‘tamiz, avvalroq Tramp joriy qilayotgan bojlar jahon miqyosida oltin narxini oshirgan edi.