Trampning tariflari savdo urushini qo‘zg‘atishi mumkin
AQSh prezidenti Donald Tramp dunyoning ko‘plab mamlakatlariga nisbatan bojxona tariflarini joriy etishini e’lon qildi. Bu qaror global savdo urushini keltirib chiqarishi mumkin, deya yozmoqda Reuters.
«Biz juda erta bosqichdamiz, ammo bu jiddiy global savdo urushiga aylanib ketishi mumkin», – deydi Mercer Advisors bosh investitsiya direktori Don Kalkagni.
Investorlar Trampning bu harakati korporativ daromadlarga zarba berishi va inflyatsiyani oshirishi mumkinligidan xavotirda.
Tahlilchilarning ta’kidlashicha, tariflarning kiritilishi iqtisodiy o‘sishning sekinlashishiga olib kelmoqda.
Infrastructure Capital Advisors bosh direktori Jey Xetfild esa bu qarorni bozor uchun eng yomon ssenariy deb atadi va Trampning ushbu qadami AQSh iqtisodiyotini retsessiyaga olib kelishi mumkinligini ta’kidladi.
Ma’lumot uchun, retsessiya iqtisodiyotdagi salbiy o‘sish jarayoni bo‘lib, umumiy ishlab chiqarish, investitsiyalar, ish o‘rinlari va iste’mol talabining kamayishiga olib keladi.
Eslatib o‘tamiz, avvalroq Tramp O‘zbekiston mahsulotlariga boj joriy qilgan edi.
