«Markaziy Osiyo – Yevropa Ittifoqi» sammitida qaysi hujjatlar imzolanadi
Samarqandda bo‘lib o‘tadigan «Markaziy Osiyo – Yevropa Ittifoqi» sammitining asosiy mavzulari savdo, investitsiyalar, yashil energiya, foydali qazilmalarni qazib olish va qayta ishlash bo‘ladi. Bu haqda Yevropa Komissiyasi raisi Ursula fon der Leyen «O‘zA»ga bergan intervyusida ma’lum qildi.
Sammitda Yevropa Ittifoqi Markaziy Osiyo mamlakatlari uchun katta investitsiya paketini e’lon qiladi. Investitsiyalar asosan transport, muhim tabiiy resurslar, elektr energiyasini uzatish va raqamlashtirish sohalariga yo‘naltiriladi.
Ursula fon der Leyenning ta’kidlashicha, Markaziy Osiyo davlatlarida xomashyo zaxiralaridan tashqari, ekologik ishlab chiqarishlarni rivojlantirish uchun katta imkoniyatlar mavjud.
«Yevropa nafaqat xom ashyo sotib olish, balki to‘liq qiymat zanjirini yaratishga intilmoqda. Bu mahalliy ish o‘rinlarini yaratish va yuqori ekologik va ijtimoiy standartlarni ta’minlash uchun muhim», – dedi Yevropa Komissiyasi raisi.
Yevropa Ittifoqi yashil loyihalar, muqobil energiya va O‘zbekistonda suv ta’minoti tizimlarini tiklashga qaratilgan investitsiyalarni amalga oshirishi haqida e’lon qiladi.
Shuningdek, Yevropa Markaziy Osiyo mamlakatlari bilan xavfsizlik, terrorizmga qarshi kurash va noqonuniy migratsiya masalalarida hamkorlikni kengaytirishni rejalashtirmoqda.
Shu bilan birga, komissiya raisi sammitda Markaziy Osiyo uchun Team Europe tashabbusi doirasidagi investitsiya paketi e’lon qiladi. Bu hujjat transport, o‘ta muhim xomashyo resurslari, raqamli tarmoq, suv va energiya transporti bilan bog‘liq.
Ma’lumot uchun, «Markaziy Osiyo – Yevropa Ittifoqi» sammiti shu yilning 3–4-aprel kunlari Samarqandda bo‘lib o‘tadi.
Avvalroq «Kursiv» 2-aprel kuni «Markaziy Osiyo – Yevropa Ittifoqi» birinchi sammitida ishtirok etish uchun Yevropa kengashi prezidenti Antoniu Koshta va Yevropa komissiyasi prezidenti Ursula fon der Lyayen O‘zbekistonga tashrif buyurgani va qanday kutib olingani haqida yozgandi.
Shu kuni Shavkat Mirziyoyev ham sammitda qatnashish uchun Samarqandga keldi.
