Yandex o‘zining raqamli yordamchisi «Alisa» uchun hozirgacha bo‘lgan eng katta yangilanishni joriy qildi. Endilikda «Alisa» mantiqiy fikrlay oladi, hujjatlar bilan ishlaydi va ingliz tilida aksentsiz gapira oladi.
Bu yangilanish YandexGPT 5 Pro va multimodal neyrotarmoq (Visual Language Model) asosida amalga oshirilgan. «Alisa» endi savolga javob berishdan oldin uni tahlil qilib, fikrlash zanjiri orqali izchil tushuntira oladi.
Yordamchi PDF, DOC, DOCX va TXT formatdagi hujjatlar bilan ishlay oladi. Buning uchun foydalanuvchi hujjatni yuklab, vazifani belgilashi kifoya. Chatga surat yuklab, u haqida savol berish ham mumkin.
Yana bir yangilik – «Live» rejimi. Bu funksiya smartfon kamerasidan foydalanib, «Alisa»ga ko‘rsatilgan obyektni tanib olish va izohlash imkonini beradi.
Shuningdek, bolalar uchun mo‘ljallangan o‘yinlar va mashg‘ulotlar ham kengaytirildi. Endi 3 – 5 yoshli bolajonlar uchun xotira, mantiq, motorika va nutqni rivojlantiruvchi topshiriqlar mavjud. Yangi imkoniyatlar «Pro» opsiyasi doirasida taqdim etilmoqda.
Eslatib o‘tamiz, avvalroq ekran va tugmalarsiz sun’iy intellektli qurilma yaratilishi haqida yozgan edik.
