O‘g‘irlangan iPhone qurilmalari bitta binoga olib kelinadi

Xitoyning Shenchjen shahrida joylashgan Feiyang Times binosi «o‘g‘irlangan iPhone binosi» sifatida tanilmoqda. Bu haqda Financial Times nashri xabar bermoqda.

Bu yerda turli mamlakatlardan, jumladan, Nyu-York, Los-Anjeles va London kabi shaharlardan o‘g‘irlangan iPhone qurilmalari to‘planib, keyinchalik ehtiyot qismlarga ajratiladi.

Bir jabrlanuvchi o‘zining qurilmasi Londondan 10 ming km masofani bosib o‘tib Shenchjendagi ushbu binoga yetib kelganini aniqlagan.

Qurilma Londondan bir nechta yo‘llar bilan Gonkongga, undan esa Shenchjenga yetkazilgan.

Feiyang Times binosi mahalliy aholi orasida «o‘g‘irlangan iPhone bozori» deb ataladi. Bu yerda sotilayotgan qurilmalarning ko‘pchiligi rasmiy modellar bo‘lib, g‘arbiy foydalanuvchilar tomonidan yangilanish vaqtida operatorlarga yoki telefon do‘konlariga topshirilgan. Biroq ko‘plab qurilmalar o‘g‘irlangan bo‘lib, bu holat Apple forumlari va ijtimoiy tarmoqlarda foydalanuvchilar tomonidan tasdiqlangan.

Bloklangan qurilmalarga bo‘lgan talab yuqori, chunki ularning komponentlari muvaffaqiyatli tarzda qayta sotiladi.

Ba’zi hollarda qurilma egalari iMessage orqali tahdidli xabarlar olib, telefonlarini ochish uchun to‘lov talab qilinadi. Bu holat global miqyosda o‘g‘irlangan iPhone qurilmalarining qanday qilib Shenchjendagi bitta markazga to‘planayotganini va ularning keyingi taqdirini ochib beradi.

Ma’lumot uchun, Feiyang Times binosi Shenzhenning Huaqiangbei tumanida joylashgan bo‘lib, bu hudud elektronika mahsulotlari savdosi bilan mashhur. Binoning uchinchi va to‘rtinchi qavatlarida asosan G‘arbiy mamlakatlardan, jumladan, AQSh, Buyuk Britaniya va Yevropa davlatlaridan kelgan ishlatilgan iPhone’lar savdosi amalga oshiriladi.

Eslatib o‘tamiz, Kursiv Uzbekistan nashri Yangi iPhone 17 narxlari qanchaga oshishi haqida yozgan edi.