iQOO kompaniyasi tomonidan 115 dollarlik iQOO Z10 Lite smartfoni taqdim etildi. Bu haqda GSMArena nashri xabar bermoqda.
Qurilma 6,74 dyuymli IPS displey bilan jihozlangan bo‘lib, 90 Gts yangilanish chastotasini qo‘llab-quvvatlaydi. Old kamera 5 MP, asosiy kamera esa 50 MP va 2 MP sensorlardan iborat.
Smartfon MediaTek Dimensity 6300 protsessorida ishlaydi. Eng kuchli versiyasi 8 GB operativ va 256 GB doimiy xotiraga ega. Akkumulyator sig‘imi 6000 mA·soat bo‘lib, 15 Vt quvvatda zaryadlashni qo‘llab-quvvatlaydi.
Qurilma IP64 darajasida chang va suvga chidamli. Shuningdek, unda stereodinamika va yon tomonda joylashgan barmoq izi skaneri mavjud. Smartfon Android 15 operatsion tizimi va Funtouch OS 15 grafik interfeysi asosida ishlaydi.
Narxlar hamyonbop: 4/128 GB versiyasi $115, 6/128 GB – $130, 8/256 GB esa $150 dan sotuvga chiqmoqda. iQOO Z10 Lite o‘z segmentida yaxshi imkoniyatlarga ega budjetli model bo‘lib, kundalik foydalanish uchun juda qulay.
Ma’lumot o‘rnida, iQOO – bu Xitoyning Vivo kompaniyasiga qarashli texnologik brend bo‘lib, 2019-yilda ta’sis etilgan. Brendning asosiy maqsadi – yuqori unumdorlikka ega, narxi nisbatan arzon bo‘lgan smartfonlar ishlab chiqarish. iQOO smartfonlari odatda kuchli protsessorlar, yaxshi sovitish tizimi va tez zaryadlanish funksiyasi bilan jihozlanadi.
Ular, ayniqsa, o‘yin o‘ynaydigan foydalanuvchilar orasida mashhur. Dizayn ham zamonaviy va texnologik talablar asosida ishlab chiqiladi. iQOO modellari odatda Android tizimida ishlaydi. Vivo‘ning Funtouch OS grafik interfeysi bilan taqdim etiladi. Shu sababli iQOO brendi o‘zining tezkor, samarali va foydalanuvchi uchun qulay qurilmalari bilan bozorda yaxshi o‘rin egallagan.
Eslatib o‘tamiz, Kursiv Uzbekistan nashri iQOO Neo 10 smartfoni haqida yozgan edi.
