RFB milliy valyutada obligatsiyalar chiqarish ustida ishlamoqda
«Kapital bozori: investitsiyalar uchun yangi imkoniyatlar» konferensiyasida Respublika fond birjasi boshqaruv raisi Georgiy Paresishvili kapital bozorini rivojlantirish bo‘yicha rejalar haqida so‘zlab berdi.
Uning aytishicha, birja yangi moliyaviy instrumentlarni, jumladan, ipoteka obligatsiyalarini rivojlantirishni qo‘llab-quvvatlaydi.
«Dunyoning ko‘plab mamlakatlarida ipoteka obligatsiyalariga barqaror talab mavjud. Biz regulyator bilan birgalikda Yevropa tiklanish va taraqqiyot banki (YTTB), Xalqaro moliya korporatsiyasi (XMK), Jahon banki va Osiyo taraqqiyot banki (OTB) kabi xalqaro moliya institutlarini milliy valyutada obligatsiyalar chiqarishga jalb etish ustida ishlayapmiz. Bu davlat obligatsiyalari bozoriga qo‘shimcha bo‘ladi», — dedi Paresishvili.
U, shuningdek, prezidentning 145-sonli farmoni doirasida yirik IPO’larni tayyorlashga alohida e’tibor qaratilayotganini ta’kidladi. Birjada quyidagi kompaniyalar aksiyalarini birlamchi ommaviy joylashtirish rejalashtirilmoqda:
- Navoiy kon-metallurgiya kombinati (NKMK);
- O‘zbekiston Milliy investitsiya jamg‘armasi.
«Dastlabki baholarga ko‘ra, bu yuqori likvidlikka ega yirik IPO’lar bo‘ladi. Biz IPO’larni ikki yo‘nalishda – Toshkent birjasida va xorijiy maydonchalarda depozit qog‘ozlar orqali o‘tkazishga umid qilamiz. Bu investorlar uchun aksiyalarni O‘zbekistonda yoki xorijda sotib olish imkoniyatini yaratadi», – dedi birja rahbari.
Buning uchun kompleks normativ-huquqiy o‘zgarishlar paketi tayyorlanmoqda. Bu jarayonga Iqtisodiyot va moliya vazirligi, regulyator va yuridik maslahatchilar jalb qilingan.
Konferensiya dasturi to‘rt tematik sessiyani o‘z ichiga oladi:
- Birinchi sessiya: O‘zbekistonda investorning e’tibori qayerga qaratilmoqda?
- Ikkinchi sessiya: O‘zbekiston obligatsiyalari bozori: yangi investitsiya vositalari
- Uchinchi sessiya: Pul qayerda ishlaydi?
- To‘rtinchi sessiya: Qanday qilib fond bozoriga chiqish va investorlarni jalb qilish mumkin?
Konferensiya spikerlari orasida:
- Botir Qobilov, Dallasdagi Texas universiteti professori (AQSh)
- Vyacheslav Pak, O‘zbekiston Respublikasi Istiqbolli loyihalar milliy agentligi direktorining birinchi o‘rinbosari
- Georgiy Paresishvili, Toshkent RFB boshqaruvi raisi
- Igor Akulov, Barclays Bank UK EM Macro Structured boshqaruv direktori
- Dauren Sapargaliyev, Freedom Broker Uzbekistan ijrochi direktori
- Otar Sharikadze, TBC Bank katta maslahatchisi, TBC Asset Management bosh direktori
Konferensiya TBC Bank, Payme, Investitsiya institutlari milliy assotsiatsiyasi va Universal banki ko‘magida o‘tkazilmoqda.
Ma’ruzachilarning chiqishlarini Zoom platformasi orqali onlayn tinglash mumkin.
Avvalroq Kursiv Uzbekistan energetika sohasi investorlarda katta qiziqish uyg‘otayotgani haqida yozgandi.
