O‘zbekistonda IT-xizmatlari eksporti besh yilda bir milliard dollarga yetdi
Besh yil davomida O‘zbekistonning IT-xizmatlari eksporti $170 milliondan $1 milliardgacha oshdi. Bu haqda O‘zbekiston prezidenti Shavkat Mirziyoyevga raqamli texnologiyalarni rivojlantirish bo‘yicha taqdimot chog‘ida ma’lum qilindi.
O‘zbekiston startaplari $70 million hajmida venchur investitsiyalarni jalb qilishga erishdi. Shuningdek, IT sohasida ishlayotgan 40 ming nafar yosh o‘zbekistonlik yuqori maosh olmoqda. IT Park rezidentlarining soni esa 2,8 mingdan oshdi, ulardan 752 nafari xorijlik.
«Mamlakat xalqaro Sun’iy intellektga tayyorgarlik indeksi bo‘yicha 17 pog‘onaga ko‘tarilib, Markaziy Osiyoda birinchi o‘rinni egalladi. O‘zbekiston telekommunikatsiya sohasining o‘sish sur’atlari bo‘yicha MDH davlatlari orasida yetakchilik qildi», – deyiladi davlat rahbari matbuot xizmatida.
Shavkat Mirziyoyevga 2026-yil uchun sohani rivojlantirish rejalari ham taqdim etildi. Jumladan, davlat xizmatlarini raqamlashtirish darajasi 70 foizga yetkaziladi, IT-xizmatlari bozori esa 100 trillion so‘mgacha oshiriladi. Kutilishicha, kelasi yilda mamlakatimiz Elektron hukumat rivojlanish indeksida (e-gov) 55-o‘ringa ko‘tariladi. Hozirgi vaqtda esa respublika ushbu indeksda 63-o‘rinni egallagan.
Taqdimotda, shuningdek, relokantlarni mamlakatda ishlashga jalb qilish uchun yaratilgan imtiyozlar haqida ham aytib o‘tildi. Shuningdek, xorijiy kompaniyalar uchun mamlakatning hududlarida jozibador muhit yaratish muhimligi ta’kidlandi.
Avvalroq «Kursiv» nashri o‘zbekistonlik xodimlarning uchdan bir qismi ayrim ishlarni sun’iy intellektga topshirmoqchiligi haqida yozgandi.
Bugungi kunda O‘zbekistonda xodimlarning 64 foizi sun’iy intellektdan ish jarayonida foydalanmoqda.
Ishchilarning fikricha, sun’iy intellekt asosan vaqtni tejaydi, ortiqcha yukni kamaytiradi va ish unumdorligini oshiradi. Ayniqsa, matn yozish, axborot izlash, hisobot tuzish, xabarlar bilan ishlash va raqamli hujjatlarni tayyorlash kabi funksiyalar ko‘pchilik tomonidan aynan SIga topshirilgan.
