2025-yilda Gollivud kinoyulduzi Bred Pitt bosh rolni ijro etgan va taniqli rejissyor Jozef Kosinski tomonidan suratga olingan Formula 1 filmi nihoyat katta ekranlarga chiqdi.
Film Formula 1 olamining ichki mexanizmlarini, poygachilar hayotidagi drama va sportning estetikasini o‘zida mujassam etgan. Biroq u haqiqiy poygachilarga yoqadimi? Tomoshabinni nima kutyapti? Kursiv Uzbekistan bu haqda ko‘plab taqrizlar, shaxsiy fikrlar va texnik jihatlarga asoslanib, batafsil sharh tayyorladi.
Bu maqoladan nimalarni bilib olasiz?
- Film haqida
- Suratga olish
- Kamchiliklar
- Qahramonlar va aktyorlik ijrosi
- Sportmi yoki reklama
- Bu oddiy film emas
- Filmni O‘zbekistonda qayerda tomosha qilish mumkin
Film haqida qisqacha
«F1» filmi asosiy e’tiborni Bred Pitt ijrosidagi Sonni Xayesga qaratadi. Bu qahramon ilgari poygachilik faoliyati bilan tanilgan, biroq jiddiy avariyadan so‘ng sportni tark etgan. Yillar o‘tib, u Apex Grand Prix jamoasiga qaytadi — endilikda ustoz va yordamchi sifatida. Bu orada yosh, mag‘rur poygachi Joshua Pirs ham sahnaga chiqadi. Ular orasidagi ziddiyatlar, jamoaviy intriga va poyga muhitidagi bosim film asosini tashkil etadi.
Suratga olish va vizual effektlar
Filmning eng kuchli jihati bu — poyga sahnalari. Kamera joylashuvi, onbord tasvirlar, trassalardagi tezlik va motor tovushlari shu qadar sifatli tasvirlanganki, siz o‘zingizni bolid ichida his qilasiz. Kosinski bu borada o‘zining «Top Gun: Maverick» filmidagi muvaffaqiyatini takrorlashga harakat qilgan. Bunday sifatli effektlarni nafaqat kinoda, balki ba’zan Formula 1 translyatsiyalarida ham uchratish qiyin.
Filmda ishlatilgan Dolby Atmos ovoz tizimi va Xans Simmer tomonidan yozilgan saundtreklar poyga muhitini yanada jonliroq qiladi. Tomoshabin har bir burilish, har bir to‘qnashuvni yuragida his etadi.
Kamchiliklar: syujet va realistiklik muammolari
Filmning asosiy tanqidga uchragan joyi bu — syujetning soddaligi va realistik emasligi. Sonni Xayes singari 60 yoshli poygachi, real hayotda hech qachon yana Formula 1 ga qayta olmaydi. Bundan tashqari, uning ba’zi harakatlari sport qoidalariga ziddir — ko‘k bayroqlarni inkor etish, qasddan to‘qnashuvlar va boshqa holatlar uchun u allaqachon diskvalifikatsiya qilinishi kerak edi.
Shuningdek, filmning o‘rtalarida ayrim syujet chiziqlari mantiqsiz tarzda yo‘qoladi. Yangi kiritilgan dramaning oxiri ko‘rsatilmaydi, qahramonlar fe’l-atvori esa yetarli darajada ochilmagan. Ko‘pchilik taqrizlarda Bred Pitt o‘zining doimiy obrazida — jozibali, ammo chuqur emotsiyasiz erkak sifatida namoyon bo‘lishi tanqid qilingan.
Qahramonlar va aktyorlik ijrosi
Bred Pitt, har doimgidek, chiroyli ko‘rinadi, lekin Sonni Xayes obrazida katta aktyorlik yutug‘i yo‘q. Undan farqli o‘laroq, Xaver Bardem ijro etgan Apex jamoasi rahbari tomoshabinlarda kuchli taassurot qoldiradi. Uning roli hayotiy, ishonarli va jo‘shqin. Sara Nils esa yosh poygachining onasi rolida filmga ijtimoiy kontekst va emotsional chuqurlik olib kiradi.
Ammo Joshua Pirs obrazi nihoyatda sayoz — xarakter, motivatsiya yoki ichki nizolar yo‘q. Shu sababli filmda muvozanat yo‘qoladi.
Sportmi yoki reklama
Tanqidchi Jedi Aragorn fikriga ko‘ra, bu film ko‘proq «Formula 1»ni targ‘ib qiluvchi 2,5 soatlik reklama. Bunda aktyorlar fonida — trassalar, logotiplar, jamoalar va haqiqiy F1 yulduzlarining qiyofalari turadi. Haqiqiy sport emas, balki u haqidagi fantaziya — aynan shunday taassurot uyg‘onadi.
Ayniqsa, texnik va taktik jihatlar, masalan pit-stop strategiyasi, bolid yangilanishlari yoki start pozitsiyalari kabi muhim jihatlar yuzaki ko‘rsatilgan.
Bu oddiy film emas
«F1» filmi – bu shunchaki poygalar yoki sport yutuqlari haqida hikoya emas. U zamonaviy Formula 1 olamini chuqur yoritishga uringan jasoratli sinov bo‘lib, tomoshabinni nafaqat trassaga olib kiradi, balki tezlik va inson ruhiyati o‘rtasidagi murakkab ziddiyatlarni ko‘rsatishga harakat qiladi.
Texnologiya va inson o‘rtasidagi kurash filmda yumshoqroq talqinda uzatiladi. Formula 1 poygalari — bu faqat tezlik emas, balki reklama manfaatlari, texnik chegara va insoniy qarorlar o‘rtasidagi to‘qnashuv. Film bu ziddiyatlarni biroz estetik silliqlik bilan yondashgan. Shu sababli ham filmni oddiy sport kartinasi emas, balki poyga olamidagi ma’naviy-psixologik murakkablikni tasvirlashga urinayotgan asar deb qarash lozim.
Filmning eng esda qolarli jihati — IMAX formatida uzatilgan poyga sahnalari edi. Ayrim joylarda tomosha paytida inson o‘zini mashina ichida yurayotgandek his qiladi. U yerda «kadr» emas, tezlik o‘zi bosh rolga chiqadi.
Yakunda aytish mumkin: bu filmga muxlis sifatida emas, balki poygalar orqasidagi hayot bilan qiziqqan tomoshabin sifatida baho berish kerak. Chunki bu film — statistikalar, pole pozitsiyalar yoki rekordlar haqida emas, bu qayta tug‘ilish haqida. Bu inson, mashina va vaqt o‘rtasidagi munosabat haqida.
Filmni O‘zbekistonda qayerda tomosha qilish mumkin
Ushbu filmni Magic Cinema, Cinemaplex, Compass Cinema, Next Cinema, Parus Cinema, Riveira Cinema, Sergeli Cinema, O‘zbegim Cinema va Buxoro kinoteatrlarida tomosha qilishingiz mumkin. Biletlarni 50 ming so‘mdan boshlab 300 ming so‘mgacha xarid qilishingiz mumkin.
E’tiborlisi, Formula 1 kinosi asl IMAX formatida Toshkentdagi Cinematica zalida tomosha qilishingiz mumkin. Biletlar 70 ming so‘mdan 300 ming so‘mgacha sotuvda mavjud. Batafsil seanslar bilan bu yerda tanishishingiz mumkin.
