Amerikaning J.D. Power agentligi 2025-yil uchun eng ishonchli avtomobillar reytingini e’lon qildi. Unda Chevrolet ham kuchli o‘ntalikka kirdi. Bu haqda Kursiv Media xabar bermoqda.
Tadqiqot AQShda 92,7 ming avtomobil egasi orasida o‘tkazilgan. Ular mashinani sotib olganidan keyingi dastlabki 90 kun ichida yuzaga kelgan muammolar haqida 227 ta savolga javob bergan.
Reyting har 100 ta avtomobilga to‘g‘ri kelgan muammo soniga qarab tuzilgan. Eng yaxshi natijani Lexus ko‘rsatgan. Undan keyingi o‘rinlarni Nissan va Hyundai egallagan. Bu brendlar ishonchli va foydalanish uchun qulay avtomobillar sifatida baholangan.
Kuchli o‘ntalikka, shuningdek, Jaguar, Honda, Dodge, Kia, Buick va Genesis ham kirgan. Biroq premium brendlar – Volvo va Audi reytingning pastki qismida joy oldi. Buning sababi murakkab texnologiyalar va foydalanuvchilarning yuqori talablaridir.
Eng ishonchli avtomobillar benzinli va oddiy gibrid modellar bo‘lib chiqdi. Elektr va ulanishi mumkin bo‘lgan gibrid avtomobillarda ko‘proq muammo aniqlangan. Shunga qaramay, Tesla o‘z ko‘rsatkichlarini yaxshilagan.
Tadqiqotdan ma’lum bo‘lishicha, to‘liq yangilangan modellar ko‘proq shikoyatga sabab bo‘lgan. Eng ko‘p e’tirozlar multimedia tizimlariga bildirilgan. Sensorli ekranlar va tugmalarning yo‘qligi oddiy funksiyalarga kirishni qiyinlashtirgan.
O‘zbekistonda esa aynan Chevrolet (111,8 ming), Kia (9 ming) va Chery (3 ming) brendlari mashhur bo‘lib, ular yil boshidan buyon yetakchilikni egallamoqda. Bu avtomobillar yangi va ikkilamchi bozorda eng ko‘p sotilayotgan mashinalar sirasiga kiradi.
J.D. Power qayd etishicha, ishonchlilik har doim brend obro‘siga bog‘liq emas. Oddiy modellarda muammo kam, foydalanish esa osonroq. Bu holat Qozog‘istonda, ayniqsa, turli relyefli hududlar uchun dolzarb.
Eslatib o‘tamiz, Kursiv Uzbekistan nashri Chevrolet Cobalt sotib olishda nimalarga ahamiyat berish kerakligi haqida yozgan edi.
