O‘zbekiston va Qozog‘iston tinch atom sohasida kadrlar tayyorlash bo‘yicha kelishuvga erishdi

«O‘zatom» agentligida Qozog‘iston delegatsiya bilan atom energetikasidan tinch maqsadlarda foydalanish bo‘yicha hamkorlikni mustahkamlashga doir uchrashuv bo‘lib o‘tdi. Bu haqda agentlik matbuot xizmati xabar berdi.

Uchrashuvda xavfsizlik, seysmik barqarorlik va ekologiya masalalari muhokama qilindi. Tomonlar AES qurilishi uchun maydonlarning seysmik xavfsizligini baholash bo‘yicha tajriba almashdi.

Radiatsiyaviy xavfsizlik va ma’lumot almashinuvi tizimini takomillashtirish, tezkor javob mexanizmlarini ishlab chiqish masalalariga alohida urg‘u berildi.

Atom sanoati uchun kadrlar tayyorlash, qo‘shma ta’lim dasturlarini yaratish va mutaxassislar malakasini oshirish bo‘yicha kelishuvga erishildi.

«O‘zatom» direktori Azim Axmedxadjayev Qozog‘istonning AES qurilishi bo‘yicha bosqichlarini ijobiy baholadi va ikki mamlakatning parallel rivojlanish jarayonida tajriba almashuvi muhimligini ta’kidladi. Qozog‘iston Respublikasi ekologiya va tabiiy resurslar vaziri o‘rinbosari Jomart Aliyev ham uchrashuvning asosiy maqsadi xatolarni takrorlamaslik va konstruktiv hamkorlik ekanini qayd etdi.

Uchrashuv yakunida tomonlar Markaziy Osiyoda xavfsiz va barqaror energetika loyihalarini amalga oshirishda yaqin hamkorlik qilishga tayyor ekanliklarini tasdiqladilar.

Avvalroq «Kursiv» nashri O‘zbekiston va Qozog‘iston Senatlari hamkorlik yo‘l xaritasini imzolagani haqida yozgandi.