1-sentabrdan O‘zbekistonda nimalar o‘zgaradi

1-sentabrdan O‘zbekistonda nimalar o‘zgaradi? «Kursiv» respublikada amalga oshadigan bir qator o‘zgarishlar haqidagi yangiliklarni keltirib o‘tadi.

• Yangi qurilayotgan obyektlarga QR-kodli pasport beriladi
• YaTTlarga zargarlik buyumlarini sotish bilan shug‘ullanishga ruxsat beriladi
• Radar belgilari majburiy tartibda o‘rnatiladi
• Maktab va bog‘cha rahbarlari maoshi oshiriladi
• Tadbirkorlarga bojxona to‘lovlari uchun yagona g‘azna hisobvarag‘i ochiladi
• Oʻzbekistonda sentabrdan xalqaro maktab faoliyatini boshlaydi
• Endilikda deportatsiya qilingan fuqarolarga ikki yil davomida «zagran» pasport berilmaydi
• Da’vo arizalarini soddalashtirilgan tartibda ko‘rib chiqish chegarasi oshiriladi
• Kam ta’minlangan oilalar farzandlariga uzaytirilgan guruhlar bepul bo‘ladi
• Ayrim korxonalar Face-ID orqali elektron mehnat shartnomalarni tuzadi

Yangi qurilayotgan obyektlarga QR-kodli pasport beriladi

Shu yilning 1-sentabrdan boshlab O‘zbekistonda har bir qurilayotgan obyekt uchun QR-kodli pasport joriy etiladi. Bu jarayon prezident farmoniga asosan amalga oshiriladi.

Bu tizim orqali shaharsozlik subyektlari, qurilish muddatlari, hujjatlar va ekspertiza xulosalari kabi muhim ma’lumotlarga tezroq ega bo‘lish mumkin.

YTTlarga zargarlik buyumlarini sotish bilan shug‘ullanishga ruxsat beriladi

1-sentabrdan boshlab qimmatbaho metallar sohasida bir qator yangiliklar kuchga kiradi:

• Yakka tartibdagi tadbirkorlarga zargarlik buyumlarini sotish faoliyati bilan shug‘ullanishga ruxsat beriladi;
• Toshkent va Nukus shaharlari hamda viloyat markazlarida Davlat asillik darajasi nazorati inspeksiyasi tomonidan zargarlik buyumlarini tekshirish va tamg‘alash bo‘yicha sayyor xizmatlar yo‘lga qo‘yiladi;
• «Soliq» mobil ilovasi orqali qimmatbaho metallar va toshlar bilan bog‘liq huquqbuzarlik haqida xabar bergan shaxslarga ularning asosida undirilgan jarima summasining 50 foizi miqdorida mukofot to‘lanadi.

Radar belgilari majburiy tartibda o‘rnatiladi

Joriy yil 1-sentabrdan boshlab barcha statsionar va mobil radarlar joylashgan joylarda, ular o‘rnatilgan hududdan 250–500 metr oldinda «Radar» yo‘l belgisini o‘rnatish majburiy bo‘ladi.

Maktab va bog‘cha rahbarlari maoshi oshiriladi

1-sentabrdan maktab direktorlarining maoshi 20 foizga, direktor o‘rinbosarlariniki esa 15 foizga oshiriladi. Bolalar bog‘chalari mudirlarining maoshi uchinchi va to‘rtinchi toifadagi maktablar direktori o‘rinbosarlarining oyligiga tenglashtiriladi.

Tadbirkorlarga bojxona to‘lovlari uchun yagona g‘azna hisobvarag‘i ochiladi

Tadbirkorlarga bojxona to‘lovlari uchun yagona g‘azna hisobvarag‘i ochiladi. Bu haqda prezident farmoni qabul qilindi.

Shuningdek farmon bilan, davlat bojxona xizmati organlarining samaradorligini oshirish bo‘yicha muhim maqsadlar belgilandi.

Oʻzbekistonda sentabrdan xalqaro maktab faoliyatini boshlaydi

Joriy yil sentabrdan boshlab xalqaro maktab faoliyatini yoʻlga qoʻyish rejalashtirilmoqda. Bu haqda Shavkat Mirziyoyev huzurida taqdim etilgan iqtidorli yoshlarni qoʻllab-quvvatlash tizimini takomillashtirishga qaratilgan dastur taqdimotida ma’lum qilindi.

Unga koʻra, joriy yil sentabrda oʻz faoliyatini boshlagan xalqaro maktablarga 8-sinf bitiruvchilari orasidan 60 nafar oʻgʻil-qiz saralab olinadi. Ular uch qismdan iborat ta’lim dasturi asosida oʻqitiladi. Oʻquv yili uch davrga boʻlinib, 11 oy davom etadi.

Endilikda deportatsiya qilingan fuqarolarga ikki yil davomida «zagran» pasport berilmaydi

Xalqaro shartnomalar asosida readmissiya qilingan (ya’ni chet elda noqonuniy qolib, O‘zbekistonga qaytarilgan) fuqarolarga 2 yil davomida xorijga chiqish uchun biometrik pasport berilmaydi. Bu haqda hukumat qarori qabul qilindi.

Qarorga ko‘ra, O‘zbekistonning xalqaro nufuziga va obro‘-e’tiboriga salbiy ta’sir ko‘rsatuvchi xatti-harakatlarni sodir etgan fuqarolarga doir ma’lumotlar Migratsiya jarayonlariga doir ma’lumotlarning yagona elektron bazasi orqali yuritiladi.

Da’vo arizalarini soddalashtirilgan tartibda ko‘rib chiqish chegarasi oshiriladi

1-sentabrdan esa da’vo arizalarini soddalashtirilgan tartibda ko‘rib chiqish chegarasi oshiriladi. Bunda yuridik shaxslar uchun BHMning 150 baravarigacha, yakka tartibdagi tadbirkorlar uchun 100 baravarigacha va jismoniy shaxslar uchun 50 baravarigacha etib belgilandi.

Mazkur qaror bank tizimida muomaladan chiqarilgan aktivlar aylanishini jadallashtirish, investorlar uchun qulay muhit yaratish va iqtisodiy faollikni oshirishga xizmat qilishi kutilmoqda.

Kam ta’minlangan oilalar farzandlariga uzaytirilgan guruhlar bepul bo‘ladi

1-sentabrdan esa maktabdagi uzaytirilgan kun guruhlariga qatnaydigan bolalar sonining 15 foizi miqdorida kam ta’minlangan oilalar farzandlari uchun alohida kvota ajratiladi va ular to‘lovdan ozod qilinadi.

Ayrim korxonalar Face-ID orqali elektron mehnat shartnomalarni tuzadi

Xodimlari 50 nafargacha bo‘lgan xizmat ko‘rsatish, qishloq xo‘jaligi va qurilish sohasidagi korxonalar Face-ID orqali elektron mehnat shartnomalarini tuzish va bekor qilishga ruxsat oladi.

Avvalroq «Kursiv» nashri 1-avgustdan O‘zbekistonda nimalar o‘zgargani haqida yozgandi.