Surxondaryoda paxta yig‘im-terimi boshlandi
Surxondaryo viloyatida 2025-yilgi paxta-yig‘im terimi boshlandi. Bu haqda viloyat hokimligi matbuot xizmati xabar berdi.
Viloyatda bu yilgi hosil uchun 62 ming 850 gektar maydonda g‘o‘za parvarishlab, mo‘l hosil yetishtirishdi. Mintaqaning issiq iqlimi va unumdor tuproqlari tufayli fermer xo‘jaliklari, oilaviy pudratlar hamda klasterlar tomonidan parvarishlangan paxta dalalarida hosil pishib, yig‘im-terim ishlari boshlandi.
Ma’lumot uchun, viloyatda hosilni o‘z vaqtida va sifatli yig‘ib olish maqsadida 1 277 ta terim otryadi shakllantirilgan. Ular ixtiyoriga 1 010 ta traktor, 1 965 ta tirkama biriktirilgan. Shuningdek, ishlarni tezkor va samarali yakunlash uchun 60 ta yangi paxta terish mashinasi xarid qilindi.
O‘zbekistonda paxta bilan bog‘liq yangiliklar
2025-yilda paxta yig‘im-terim mavsumida 1 tonna paxta xomashyosini paxta terish mashinalarida terib olish xizmatlari uchun tavsiyaviy tariflar e’lon qilindi. Bu haqda Qishloq xo‘jaligi vazirligi xabar berdi. Unga ko‘ra, xizmatning o‘rtacha bahosi 1 372 925 so‘m (yoqilg‘isiz) etib belgilandi.
Shuningdek, avgust oyi boshida O‘zbekiston AQShdan paxta importi masalalarini muhokama qilgandi.
Unga ko‘ra, AQSh Qishloq xo‘jaligi vazirligi va AQSh Paxta Assotsiatsiyasi bilan bo‘lgan muzokaralarda GSM-102 dasturi doirasida O‘zbekistonga Amerika paxtasini yetkazib berish, kredit limitini oshirish va Made from U.S. Cotton tashabbusini ishga tushirish masalalari ko‘rib chiqildi.
Shu bilan birga, paxtani o‘z vaqtida va sifatli terib olishni ta’minlash maqsadida fermerlarga tonnasiga bir million so‘mdan subsidiya beriladi. Korxonalar o‘z mablag‘i hisobidan paxta yetishtirsa yoki xarid qilsa, xomashyo qiymatining 10 foizi qoplab beriladi.
Hukumat qarori bilan joriy yil 24-iyulda paxta yetishtirishga ajratilgan kreditlarning foiz to‘lovlarini qisman subsidiya qilish to‘g‘risidagi nizom tasdiqlandi.
Unga ko‘ra, paxta xomashyosini yetishtirish uchun ajratilgan imtiyozli kreditlarni hosil yili yakuniga qadar to‘liq qaytargan qishloq xo‘jaligi subyektlariga foiz to‘lovlarining bir qismi subsidiya sifatida qaytariladi.
May oyida O‘zbekiston Afg‘onistonga 5 tonna paxta chigiti sovg‘a qilgandi. Bu 200 gektar maydonga ekish uchun yetarli bo‘ladi.
