O‘zbekistonda oliy ta’lim qamrovi to‘qqiz foizdan 42 foizga oshdi — prezident

Prezident Mustaqillik bayrami arafasida mamlakat taraqqiyoti va kelgusidagi rejalar haqida ma’lumot berdi. Bu haqda davlat rahbari matbuot xizmati ma’lum qildi.

So‘nggi yillarda elektr energiyasi ishlab chiqarish 59 mlrd kVt/soatdan 85 mlrdga yetdi, 2030 yilga kelib qayta tiklanuvchi energiya ulushi 54 foizga yetkazilishi belgilangan. «Yashil makon» dasturi doirasida 1 mlrddan ortiq daraxt va buta ekilib, shaharlar yashilligi 30 foizga oshirilmoqda.

Shu davrda 31 mln kvadrat metr uy-joy qurildi, bu yil 130 ming xonadon foydalanishga topshiriladi. Kam ta’minlangan oilalarni qo‘llab-quvvatlash uchun 19 trln so‘m ajratilib, kambag‘allik darajasi 6,8 foizgacha kamaydi.

Oliy ta’lim qamrovi 9 foizdan 42 foizga oshdi, 35 ta universitet xalqaro reytinglarda qayd etildi, minglab yoshlar xorijiy grantlarda o‘qimoqda. Aholining o‘rtacha umr ko‘rishi 75 yoshga yetdi, yangi klinikalar va diagnostika markazlari ishga tushirildi, shoshilinch tibbiy yordam tizimi modernizatsiya qilindi.

Sud-huquq sohasida shaffoflik kuchayib, inson huquqlari xalqaro reytinglarda yaxshilandi. Yoshlar ilmiy loyihalar va sportda katta yutuqlarga erishmoqda, terma jamoalarimiz Osiyo va jahon chempionatlarida yuqori o‘rinlarni egallamoqda.

«Hozirgi murakkab vaziyatni hisobga olib, mustaqilligimizni, yurtimizdagi tinchlik, millatlar va dinlar o‘rtasida hamjihatlikni mustahkamlash uchun kelgusida ham bor kuch va imkoniyatlarimizni safarbar etamiz», dedi prezident.

Tashqi siyosatda esa O‘zbekiston Markaziy Osiyoda barqarorlik va hamkorlikni mustahkamlashga alohida e’tibor qaratmoqda.

Prezident yakunida shunday dedi: “Biz barchamiz bir xalqmiz, bir mamlakatmiz, bir oilamiz. Birgalikda Yangi O‘zbekistonni quramiz».

Eslatib o‘tamiz, avvalroq Shavkat Mirziyoyev Shahidlar xiyoboni va «Yangi O‘zbekiston» bog‘iga tashrif buyurgan edi.