Toshkent maktablarida yuqori sinflar uchun «Smart School» tizimi joriy etiladi

Toshkent shahridagi barcha umumta’lim maktablarining 10 – 11-sinf xonalariga maxsus kamera o‘rnatilishi hamda «Smart School» elektron dasturi joriy etilishi belgilandi. Bu haqda shahar hokimining qarorida keltirilgan.

Qarorga ko‘ra, loyiha orqali yuqori sinf o‘quvchilarining davomatini kuzatish, fanlarga qiziqishlarini o‘rganish va ta’lim sifatini baholash maqsad qilingan. Shuningdek, sun’iy intellekt yordamida o‘quvchilarning ruhiy holati aniqlanadi, o‘qituvchilarning pedagogik salohiyati baholanadi.

Dastlabki bosqichda loyiha Olmazor tumanidagi 31 ta maktabning 250 ta sinfida sinov tariqasida yo‘lga qo‘yiladi. Maxsus kameralar tuman mahalliy budjeti mablag‘lari hisobidan o‘rnatiladi.

Qaror ijrosini nazorat qilish Toshkent shahar hokimining o‘rinbosari D. Rahimova zimmasiga yuklatilgan.

Eslatib o‘tamiz, Kursiv Uzbekistan nashri Toshkentdagi ayrim maktablarda yangi ta’lim tizimi joriy etilishi haqida yozgan edi.