Mirziyoyev Lukashenkoni tug‘ilgan kuni bilan tabrikladi
O‘zbekiston prezidenti Shavkat Mirziyoyev Belarus rahbari Aleksandr Lukashenkoni tug‘ilgan kuni bilan tabrikladi. Bu haqda davlat rahbari matbuot xizmati xabar berdi.
Shu bilan birga, Belarus prezidenti ham o‘zbekistonlik hamkasbini va xalqimizni Mustaqillik bayrami bilan muborakbod etib, mamlakatimizga barqaror taraqqiyot va rivoj tilagan.
«Turli darajalardagi muloqot va almashinuvlar samarali bo‘layotgani mamnuniyat bilan qayd etildi. Tovar ayirboshlash hajmi yil boshidan buyon 30 foizga oshdi. Yetakchi korxonalarning qishloq xo‘jaligi, elektrotexnika, mashinasozlik, to‘qimachilik va boshqa tarmoqlardagi kooperatsiya loyihalari amalga oshirilmoqda. Parlamentlararo, ishbilarmonlik va madaniy-gumanitar aloqalar faol rivojlanmoqda», – deyiladi prezident matbuot xizmati bayonotida.
Ikki davlat rahbari, shuningdek, yaqin kelajakda o‘tkazilishi rejalashtirilgan uchrashuvlar va tadbirlar jadvalini muhokama qilgan.
Statistika qo‘mitasi ma’lumotlariga ko‘ra, joriy yil avgust holatiga Belarus mamlakatimizning asosiy 20 savdo hamkorlari qatoriga kirib, 14-o‘rinni egallagan. O‘zaro savdo hajmi esa $492,6 mlndan oshgan.
Avvalroq «Yangi O‘zbekiston» bog‘ida davlat mustaqilligining 34 yilligi munosabati bilan tantanali bayram tadbiri bo‘lib o‘tgani haqida yozgan edik.
