Leapmotor kompaniyasi Leapmotor B05 avtomobilini (ichki bozorda Lafa 5 nomi bilan tanilgan) noyabr oyida Guangzhou avtosalonida rasman taqdim etadi. Bu haqda CarNewsChina xabar bermoqda.
Hozirda Xitoyda mashina uchun oldindan buyurtmalar qabul qilinmoqda. Dastlabki yetkazib berish ishlari 2025-yilning oxirida boshlanadi. B05 Ultra versiyasi esa 2026-yilda sotuvga chiqarilishi rejalashtirilgan.
Suratga olingan interyer tafsilotlariga ko‘ra, model ichki qismi ko‘proq B01 sedanini eslatadi. Old panelda yirik sensorli ekran joylashgan, haydovchi uchun esa ixcham raqamli asboblar paneli va ikki spikali rul o‘rnatilgan. Markaziy konsolda simsiz quvvatlash panjarasi mavjud. Ichki makon hajmi ham B01 ga yaqin bo‘lishi aytilmoqda.
Tashqi dizayn ham Leapmotor’ning an’anaviy uslubida ishlangan. Old qismida faralarni birlashtirib turuvchi keng LED chiziq, yopiq radiator panjarasi va trapetsiya shaklidagi havo kirish qismi mavjud. Model olti xil rangda taqdim etiladi. Yon tomondan ko‘rinishda ramkasiz eshiklar va aerodinamik tutqichlar diqqatga sazovor. Avtomobil 19 dyuymli g‘ildiraklarda harakatlanadi. Orqa qismida uzluksiz chiroq chizig‘i va tom usti spoyleri joylashgan. O‘lchamlari 4 430 x 1 880 x 1 520 mm bo‘lib, g‘ildirak bazasi 2 735 mm ni tashkil etadi.
B05 LEAP 3.5 modular platformasida ishlab chiqilgan bo‘lib, u B10 krossoverida ham qo‘llaniladi. To‘liq texnik ko‘rsatkichlar hozircha oshkor qilinmagan. Biroq mashina B10 bilan bir xil kuch uzatish variantlariga ega bo‘lishi kutilmoqda. Bunga 132 kVt quvvatli motor va 56,2 kVt/soat LFP batareyaga ega bazaviy versiya, hamda 160 kVt motor va 67,1 kVt/soatlik batareyaga ega yuqori darajali komplektatsiyalar kiradi.
Leapmotor vitse-prezidenti Cao Linning so‘zlariga ko‘ra, Lafa 5 kompaniyaning xalqaro bozorga chiqish rejasining muhim qismi hisoblanadi. Modelning global debyuti 2025-yil sentabr oyida Myunxenda bo‘lib o‘tgan IAA Mobility ko‘rgazmasida amalga oshirilgan va u Yevropada Volkswagen ID.3 kabi ixcham elektromobillarga raqobatchi sifatida taqdim etiladi.
Eslatib o‘tamiz, Kursiv Uzbekistan Leapmotor D16 avtomobili yaqin orada taqdim etilishi haqida yozgan edi.
