Xitoyning Great Wall Motor kompaniyasiga qarashli Ora brendi tomonidan yangi GWM Ora 5 elektromobili e’lon qilindi. Yangi avtomobil 25-sentabr kuni o‘tkaziladigan Natural Aesthetics Design Appreciation tadbirida rasman taqdim etiladi. Bu haqda CarNewsChina xabar bermoqda.
Model nomi jamoatchilik o‘rtasida o‘tkazilgan so‘rov orqali tanlangan. Ora brendi bosh menejeri Lu Venbin 12-sentabrda Ora Cat, Ora 5 va Ora i5 variantlarini taklif qilgan, natijada eng ko‘p ovoz olgan Ora 5 nomi tanlab olingan. Menejerning ta’kidlashicha, raqamli nomlash tizimi xalqaro miqyosda tanish, sodda va brendning kelgusi modellari uchun yagona yo‘nalishni belgilaydi.
Dizayni haqida Xitoy Sanoat va axborot texnologiyalari vazirligi tomonidan taqdim etilgan hujjatlar ayrim tafsilotlarni ochiqladi. Mashina brendning retro uslubidagi dizayn tilini davom ettiradi. Old qismida oval shakldagi faralar, yopiq panjara va o‘zgacha ko‘rinish beruvchi katta pastki havo kirish qismi joylashgan. Panoramik shisha tom standart bo‘lib, qo‘shimcha opsiya sifatida oddiy qattiq tom ham taklif etiladi. Ba’zi versiyalarda tom relslari va LiDAR sensori o‘rnatilishi mumkin. Orqa qismida esa keng va yumaloq chiziqlarga ega eshik, shuningdek, GWM yoki Ora logotipi bilan tanlash imkoniyati mavjud.
O‘lchamlarga ko‘ra, Ora 5 kompakt SUV segmentiga mansub. Uning uzunligi 4 471 mm, eni 1 833 – 1 844 mm, balandligi 1 641 mm va g‘ildiraklar bazasi 2 720 mm. Bu ko‘rsatkichlar uni Ora Good Cat modelidan ancha kattaroq qiladi.
Texnik jihatdan avtomobil Hycet (GWM sho‘ba korxonasi) tomonidan ishlab chiqilgan 150 kVt quvvatli elektromotor bilan jihozlanadi. Batareya esa SVOLT (Honeycomb Energy) kompaniyasi tomonidan yetkazib beriladi. Batareyaning hajmi hozircha oshkor qilinmagan, biroq hujjatlarda avtomobilning maksimal tezligi 170 km/soat deb ko‘rsatilgan. Shuningdek, mashina uchun LiDAR, radar, turli kamera tizimlari, rangli tom variantlari va turli g‘ildirak dizaynlari opsiya sifatida taklif qilinadi.
Eslatib o‘tamiz, Kursiv Uzbekistan yangilangan Chevrolet Cobalt haqida ma’lumotlarni to‘plagan edi.
