Geely kompaniyasi tomonidan Xitoy bozorida yangilangan Geely Monjaro 2026 avtomobili rasman sotuvga chiqarildi. Bu haqda Autohome xabar bermoqda.
Krossover uch xil komplektatsiyada taqdim etilib, narxi 145,7 ming yuandan (taxminan $20 ming) boshlanadi.
Yangilangan Monjaro avvalgidan kattaroq hajmda taqdim etiladi. U 2 litrli, 272 ot kuchiga ega benzinli dvigatel va 8 pog‘onali avtomatik uzatma bilan jihozlangan. Mashinada adaptiv osma tizimi mavjud bo‘lib, 0 dan 100 km/soat tezlikka atigi 7,3 soniyada chiqadi.
Avtomobil o‘lchamlari 4795×1895×1689 mm bo‘lib, g‘ildirak bazasi 2845 mm. Salonida uchta ekran saqlanib qolgan, biroq konfiguratsiya yangilandi: endi ikki katta ekran bitta blokka birlashtirilgan. Bu yechim ilgari Li Auto avtomobillarida qo‘llangan uslubni eslatadi.
Yangi modelning narxi va texnik imkoniyatlari uni Xitoyda xaridorlar orasida yuqori talabga ega qildi. Shu bilan birga, Geely bugun yana bir yangilikni e’lon qildi — Geely Preface 2026 savdosi ham boshlandi.
Eslatib o‘tamiz, Kursiv Uzbekistan yangi Geely Galaxy M9 taqdim etilgani haqida yozgan edi.
