Audi kompaniyasi 2026-yilgi yangilangan model qatorini rasman namoyish etdi. Taqdimotda A3, Q7 va Q8 modellarining yangi versiyalari e’lon qilindi.
Asosiy yangiliklar orasida to‘liq g‘ildirakdan tortuvchi A3 TFSI quattro, Q7 S line seriyasining kengaytirilishi hamda yangi RS Q8 modellarining taqdimoti bor.
Audi A3 quattro
Kompakt Audi A3 endilikda 2,0 litrli turbo dvigatel bilan jihozlanadi. U 201 ot kuchi va 320 N·m momentga ega. Quattro tizimi bilan jihozlangan yangi A3 hatchbek va sedan 0 dan 100 km/soatgacha atigi 6,3 soniyada tezlanadi – bu bazaviy versiyadan deyarli ikki baravar tez. Model dinamiklik va tejamkorlik o‘rtasidagi mukammal muvozanat sifatida taqdim etilmoqda.
Audi Q7 S line
Yirik krossover Audi Q7 uchun ikki yangi S line modifikatsiya ishlab chiqilgan: TFSI quattro (benzin) va TDI quattro (dizel). Ular sport uslubidagi tashqi ko‘rinishga ega bo‘lib, 21 dyuymli Audi Sport disklari, o‘ziga xos interyer bezaklari va qora shift qoplamasi bilan ajralib turadi. Avstraliya bozorida yangilangan Q7 narxlari 112 415 avstraliya dollaridan boshlanadi.
RS Q8 seriyasi
Audi’ning sport segmentidagi eng muhim yangiligi – RS Q8 modelining kengaytirilgan qatori. Endilikda ilgari faqat RS Q8 Performance mavjud bo‘lgan bo‘lsa, unga qo‘shimcha ravishda «bazaviy» RS Q8 versiyasi ham taqdim etildi.
Ushbu krossoverda 4,0 litrli V8 dvigatel, 591 ot kuchi va 800 N·m moment mavjud. To‘liq g‘ildirakdan tortuvchi quattro tizimi yordamida u 100 km/soat tezlikka atigi 3,8 soniyada chiqadi – bu Performance versiyasidan bor-yo‘g‘i 0,2 soniyaga sekinroq.
Eslatib o‘tamiz, Kursiv Uzbekistan Audi 2028-yilda yangi avlod A4 elektromobilini taqdim etishi haqida yozgan edi.
