Hindistonda Moto G57 Power smartfoni rasmiy ravishda taqdim etildi. Bu haqda Gizmochina nashri xabar bermoqda.
Qurilma o‘zining juda katta akkumulyatori, 120 Hz ekran yangilanish chastotasi va Sony kamerasi bilan e’tibor qaratmoqda. Narxi esa atigi $170 bo‘lib, bozordagi eng jozibador budjet modellardan biri bo‘lishi kutilmoqda.
Moto kompaniyasi ma’lumotiga ko‘ra, smartfon 7000 mA/soat sig‘imli akkumulyator bilan jihozlangan. TurboPower tezkor zaryadlash texnologiyasi 30 Vt kuchga ega. Rasmiy hisob-kitoblarga ko‘ra, Moto G57 Power bir marta to‘liq zaryad bilan uch kungacha ishlashi mumkin.
Smartfon 6,7 dyuymli IPS ekran bilan taqdim etilgan. Ekran Full HD+ ruxsatga ega bo‘lib, 120 Hz yangilanish chastotasini qo‘llab-quvvatlaydi. Bu esa qurilmadan video ko‘rish va o‘yin o‘ynashda yanada silliq tasvir olish imkonini beradi.
Modelning asosiy texnik asosini Snapdragon 6s Gen 4 protsessori tashkil etadi. Operativ xotira hajmi 8 GB, doimiy xotira esa 128 GB qilib belgilangan. Asosiy kamera tizimi ikki modulga ega — 50 MP va 8 MP. Bosh sensor sifatida Sony LYT-600 qo‘llanilgan bo‘lib, yorug‘lik sharoitida yuqori sifatli suratlar olishga imkon beradi.
Moto G57 Power Android 16 operatsion tizimi bilan sotuvga chiqadi. Qurilmaga Android 17 yangilanishi kafolatlangan, shuningdek, uch yil davomida xavfsizlik yangilanishlari qo‘llab-quvvatlanadi.
Katta akkumulyator, zamonaviy ekran va kuchli kamera tizimini inobatga olganda, bu segment uchun raqobatbardosh ko‘rsatkichdir.
Avvalroq Kursiv Uzbekistan Realme GT 8 Pro Yevropada va Hindistonda sotuvga chiqqani haqida yozgan edi.
