Hafta davomida davomida dollar qanchaga pastladi
24–28-noyabr kunlari O‘zbekistonda AQSh dollarining rasmiy kursi notekis harakatlandi. Haftaning boshida valyuta asta-sekin mustahkamlanib, keyin pasaydi va yakunda yana biroz ko‘tarildi. «Kursiv» nashining ushbu maqolasida dollar kursining hafta davomidagi o‘zgarishi haqida so‘z boradi.
24-noyabrda o‘sish keskinlashdi va dollar 11 971,40 so‘mga yetdi. Bu bir kunda 56,73 so‘mlik sakrash bo‘ldi. 25-noyabr kuni ko‘tarilish davom etdi. Kurs 11 988,32 so‘m etib belgilandi va bu 16,92 so‘mlik qo‘shimcha o‘sish bilan hafta davomidagi eng yuqori daraja bo‘ldi.
26-noyabrda vaziyat o‘zgardi. Dollar 11 936,89 so‘mgacha pasaydi. Qisqa fursatda kurs 51,43 so‘mga tushdi. 27-noyabrda pasayish yana davom etdi. AQSh valyutasi 11 881,60 so‘mni tashkil etdi va bu bir kunda 55,29 so‘mlik pasayish bilan haftadagi eng past ko‘rsatkich bo‘ldi.
28-noyabr kuni esa dollar yana biroz tiklandi. Kurs 11 902,30 so‘mga tenglashdi. Kunlik o‘sish 20,7 so‘mni tashkil etdi. Shunday qilib, hafta yakunida dollar kursi keskin sakrashsiz, ammo yuqoriga va pastga yo‘nalgan harakatlar bilan yakunlandi.
Umumiy hisobda AQSh valyutasi hafta davomida 12,37 so‘mga pasaydi.
Dollar kursi o‘zgarishiga 2026-yilda qaysi omillar ta’sir qiladi
2026-yilda dollar kursining o‘zgarishiga bir vaqtning o‘zida bir nechta tashqi va ichki omillar ta’sir qiladi. Bu haqda Markaziy bank tomonidan o‘tkazilgan xalqaro davra suhbatida Markaziy bank raisi o‘rinbosari Nodirbek Achilov Kursiv Uzbekistan’ga ma’lum qildi.
Achilovning aytishicha, tashqi omillar qatoriga tashqi savdo hamkorlaridagi vaziyat, u yerda kurs va inflyatsiya darajasi, shuningdek, iqtisodiy faollik kiradi.
«Bundan tashqari, to‘g‘ridan to‘g‘ri biz bilan bog‘liq bo‘lgan omillar – eksport tushumlari, pul o‘tkazmalaridan tushumlar, xorijiy kredit liniyalari va xorijiy investitsiyalardan tushumlar. Bu o‘z-o‘zidan bozorda taklifni shakllantirib, bozor dinamikasini belgilab beruvchi omil hisoblanadi», – deya aniqlashtirgan u.
Achilov ichki omillar qatoriga kreditlarning hajmi, naqd pul hajmi, pul muomalasidagi o‘zgarishlar va kreditga bo‘lgan talabni kiritgan. Unga ko‘ra, bu omillar birgalikda bozordagi taklif va talabni belgilab, valyuta kursining umumiy dinamikasini shakllantiradi.
Eslatib o‘tamiz, Kursiv Uzbekistan nashri 3-dekabr uchun valyuta kurslari e’lon qilingani haqida yozgan edi.
