Chery kompaniyasi Chery Exeed Exlantix MX nomli yangi krossoverni rasman namoyish qildi. Bu haqda CarNewsChina xabar bermoqda. Model Exlantix ET5 platformasi asosida yaratilgan bo‘lib, Xitoy bozorida allaqachon savdoga chiqdi. Avtomobilning narxi $19 mingdan boshlanadi.
Krossover gibrid kuch qurilmasiga ega. Unda 1,5 litrli turbomotor faqat generator vazifasini bajaradi. Harakat esa orqa joylashgan 195 kVt quvvat va 324 Nm momentga ega elektromotor orqali amalga oshiriladi. 32,66 kVt/soatli LFP batareya faqat elektrda 210 km yurishni ta’minlaydi. Umumiy yurish masofasi esa CLTC sikliga ko‘ra 1 310 km ga yetadi.
Tashqi ko‘rinishda yopiq old panel, brendga xos optika dizayni va zamonaviy chiziqlar ajralib turadi. Krossoverning o‘lchamlari 4 780 x 1 890 x 1 720 mm, g‘ildirak bazasi 2 800 mm. Yuqori komplektatsiyalarda tom qismiga LiDAR bloki o‘rnatilgan. Bu ilg‘or yordamchi tizimlar mavjudligining yaqqol belgisi hisoblanadi.
Salon to‘liq raqamlashtirilgan. Haydovchi uchun 10,25 dyuymli pribor paneli o‘rnatilgan. Markaziy sensorli ekran 15,6 dyuymni tashkil etadi. Old yo‘lovchi uchun alohida 12,3 dyuymli displey mavjud. Multimedia tizimi Snapdragon 8255 platformasi asosida ishlaydi. Pardozlashda Nappa charm, alkantara hamda ikki rangli kombinatsiya ishlatilgan.
Xavfsizlik va yordamchi tizimlar majmuasi LiDAR, jami 27 ta sensor, radar va kameralarni o‘z ichiga oladi. Ushbu tizimlar shahar va trassa rejimlarida yordamchi boshqaruv, avtomatik to‘xtash joyiga qo‘yish va boshqa funksiyalarni ta’minlaydi.
Eslatib o‘tamiz, Kursiv Uzbekistan nashri Chery Fulwin T9L avtomobili qanday imkoniyatlar bilan taqdim etilgani haqida yozgan edi.
