Avtotransportlar uchun ekologik stiker berish tartibi belgilandi

O‘zbekistonda avtotransportlar uchun ekologik stiker berish tartibi belgilandi. Bu haqda Adliya vazirligi xabar bermoqda.

Yangi hujjatga ko‘ra, avtomobillarning ekologik toifasi ishlab chiqaruvchi tomonidan ko‘rsatilgan ekologik sinf asosida aniqlanadi.

Nizomga muvofiq, benzin hamda siqilgan yoki suyultirilgan gazda yuruvchi transport vositalarida «Yevro-2» va undan yuqori ekologik sinfga mansublari «toza» toifaga kiritiladi. «Yevro-0» va «Yevro-1» sinfidagi avtomobillar esa «o‘rta» ekologik toifaga ajratiladi.

Dizel yoqilg‘ida harakatlanuvchi transportlarda «Yevro-4» va undan yuqori sinf «toza» toifa hisoblanadi. «Yevro-3» darajadagi avtomobillar «o‘rta» toifaga kiritiladi. «Yevro-0», «Yevro-1» va «Yevro-2» sinfidagi dizel avtomobillar esa «zararli» ekologik toifaga mansub bo‘ladi.

Gibrid avtomobillar, muqobil yoqilg‘ida harakatlanuvchi transport vositalari hamda ishlab chiqarilganiga 3 yildan oshmagan avtomobillar avtomatik tarzda «toza» ekologik toifaga kiritiladi.

Transport vositalarini ro‘yxatdan o‘tkazish yoki qayta ro‘yxatdan o‘tkazish jarayonida ularning ekologik toifasiga mos ravishda «yashil», «sariq» yoki «qizil» rangli ekologik stikerlar taqdim etiladi. Stikerlarni Davlat yo‘l harakati xavfsizligi bo‘linmalarida ekologik operatorlar beradi.

Avtomobil egalari ekologik stiker olish uchun ixtiyoriy ravishda Ichki ishlar vazirligi Jamoat xavfsizligi departamenti Yo‘l harakati xavfsizligi xizmati rasmiy veb-sayti yoki Yagona interaktiv davlat xizmatlari portali my.gov.uz orqali ariza topshirishi mumkin.

Ariza belgilangan mezonlarga mos bo‘lganda, transport vositasiga uning toifasiga muvofiq ekologik stiker beriladi. Ekologik stikerlar muddatsiz amal qiladi.

Eslatib o‘tamiz, Kursiv Uzbekistan Zangiotada ekologiyaga zarar yetkazayotgan g‘isht zavodi faoliyati to‘xtatilgani haqida yozgan edi.