Xitoy elektromobil ishlab chiqaruvchisi BYD Qin Plus DM-i plagin-gibrid sedanlaridan 88 981 dona avtomobilni chaqirib olishga qaror qildi. Bu haqda CarNewsChina xabar bermoqda.
Xitoyning Bozorni nazorat qilish davlat boshqarmasi talabi bilan boshlangan tekshiruv shuni ko‘rsatdiki, ayrim batareya bloklarida barqarorlik muammosi mavjud.
Chaqarib olish ikki ishlab chiqarish partiyasini qamrab oladi. Birinchi guruh — 2021-yil 26-sentabrdan 2023-yil 23-sentabrga qadar ishlab chiqarilgan 52 890 ta avtomobil. Ikkinchi partiya — 2021-yil 7-yanvardan 2022-yil 30-sentabrgacha chiqarilgan 36 091 ta mashina.
Muammoni bartaraf etish uchun BYD barcha zararlangan avtomobillarga masofadan turib OTA dasturiy yangilanish yuboradi. Dastur nosozlik aniqlanganida panelda ogohlantiruvchi belgi paydo bo‘ladi. Shundan so‘ng avtomobil egalari rasmiy dilerlarga murojaat qiladi, u yerda batareya bloklari bepul almashtirib beriladi.
Avtomobil egalari chaqirib olish haqida pochta, telefon qo‘ng‘irog‘i yoki SMS orqali xabardor qilinadi. Shuningdek, ular BYD mijozlarni qo‘llab-quvvatlash markaziga murojaat qilishi yoki regulyatorning maxsus sayti orqali avtomobilining chaqirib olish ro‘yxatiga kirishini tekshirishi mumkin.
Bu chaqirib olish kompaniyaning yaqinda amalga oshirgan yirik aksiyasidan keyin e’lon qilindi. Avvalroq BYD Tang va BYD Yuan Pro modellarini o‘z ichiga olgan 115 mingdan ortiq avtomobil dizayn va batareya bilan bog‘liq xavfsizlik muammolari sabab chaqirib olingan.
Eslatib o‘tamiz, Kursiv Uzbekistan nashri BYD Atto 8 gibrid modeli taqdim etilgani haqida yozgan edi.
