Toshkentda havoni ifloslantirayotgan 100 dan ortiq obyektning faoliyati to‘xtatildi

Toshkentda havoni ifloslantirayotgan 100 dan ortiq obyektning faoliyati to‘xtatildi. 24–28-noyabr kunlari poytaxtda o‘tkazilgan reydlar natijalari bo‘yicha Davlat ekologik nazorat inspeksiyasi boshlig‘ining birinchi o‘rinbosari Ikrom Tagayev ma’lumot berdi.

Reydlar davomida 1,4 mingta issiqxona o‘rganilib, ulardan 67 tasining ekologiya talablariga rioya qilmagani uchun faoliyati to‘xtatildi. 403 nafar shaxsga ma’muriy bayonnoma rasmiylashtirildi. Ba’zi issiqxonalarga gazga ulanish uchun texnik shartlar berildi.

Shuningdek, qurilish obyektlari bo‘yicha tekshiruvlarda 53 ta noqonuniy qurilish aniqlanib, ularni bartaraf etish ishlari boshlandi. 186 ta holatda havoning ifloslanishi qayd etildi, 235 ta qurilish maydonida esa ko‘kalamzorlashtirish talabga javob bermagani aniqlandi. Shundan kelib chiqib, 34 ta obyekt qurilishi vaqtincha to‘xtatildi, 188 nafar shaxs javobgarlikka tortildi. 51 ta obyektga changni kamaytirish uchun suv purkagich o‘rnatildi.

Avtotransport bo‘yicha ham qoidabuzarliklar kuzatildi. Yukini tent bilan yopmasdan harakatlangan 837 ta haydovchi, shuningdek, havoni me’yordan ortiq ifloslantirgan 206 nafar haydovchi jarimaga tortildi.

Bundan tashqari, shahar mikroiqlimini yaxshilash maqsadida 77 ta ko‘cha va 165 jamoat joylarida suv sepilib, chang kamaytirildi. 121 km ariqlar tozalanib, 126 ta favvora ishga tushirildi. Toshkent viloyatidagi daryo va soylarda noqonuniy qum-shag‘al qazib olish bo‘yicha 54 ta holat aniqlanib, ularga nisbatan chora ko‘rilmoqda.

Ikrom Tagayevga ko‘ra, mazkur choralar natijasida PM 2.5 zarrachalar miqdori sezilarli kamaydi. 24-noyabrda 171 mikrogramm bo‘lgan ko‘rsatkich 28-noyabrga kelib 97 mikrogrammga tushdi.

Avvalroq «Oʻzgidromet» respublika hududida sovuq antisiklon ta’siri 5-dekabrga qadar saqlanishini ma’lum qilgandi. Yangilangan tahlillar sovuq antisiklon fonida inversiya yanada uzoqroq davom etishini ko‘rsatmoqda. Uzoq muddatli inversiya natijasida havoda chang, tutun va mayda zarrachalar miqdori ortishi, shuningdek, qalin tuman kuzatilishi mumkin.