Ta’lim muassasalarida xavfsizlikni kuchaytiruvchi «Xavfsiz ta’lim» konsepsiyasi joriy etiladi

Prezident qaroriga ko‘ra, ta’lim muassasalarida xavfsizlikni kuchaytiruvchi «Xavfsiz ta’lim» konsepsiyasi joriy etiladi.

Unga ko‘ra, maktablar, nodavlat ta’lim tashkilotlari va xorijiy ta’lim muassasalari filiallarining xavfsizligi jismoniy va texnik qo‘riqlash tizimlari orqali ta’minlanadi. Qo‘riqlash departamenti shartnoma asosida ta’lim obyektlariga qo‘riqlash signalizatsiyasi, «tashvish tugmasi» tizimlari, videokuzatuv moslamalarini o‘rnatadi va ularga xizmat ko‘rsatadi.

Shuningdek, kuchli jinoyatchilik kuzatiladigan hududlardagi mahallalarda qo‘riqlash vazifalarini samarali bajarish uchun huquq-tartibot maskanlari tarkibiga qo‘riqlash xizmati inspektori lavozimi kiritiladi.

Bundan tashqari, xavf yuqori bo‘lgan hududlarda, turistlar ko‘p tashrif buyuradigan obyektlar va ommaviy dam olish joylarida qo‘riqlash-patrul xizmati tashkil etiladi.

Avvalroq, 2024-yilda oliy ta’lim muassasalari talabalari ishtirokida 761 ta jinoyat sodir etilgan. Raqamlarga ko‘ra, 2025-yilning dastlabki olti oyida esa 102 ta oliy ta’lim muassasasida 307 nafar talaba turli jinoyatlarga qo‘l urgan. Bunda asosiy jinoyatlar yo‘l-transport hodisalari, o‘g‘rilik, tan jarohati yetkazish, bezorilik va firibgarlik bilan bog‘liq.