Seres kompaniyasi uchinchi avlod Landian E5 Plus modelini rasman taqdim etdi. Bu haqda CarNewsChina xabar bermoqda.
O‘rta o‘lchamli krossover ikki komplektatsiyada sotuvga chiqarildi. Har ikkala variant narxi 119 800 yuan yoki qariyb $16,8 ming etib belgilandi.
Yangi modelda asosiy yangilik sof elektr yurish zaxirasining 230 km gacha oshirilganidir. Dizaynda old tomonda uzluksiz LED chiroq tasmasi paydo bo‘ldi. Old panjara yopiq ko‘rinishga ega. Yon tomonda zich spoke disklar va oynalar atrofida xrom bezaklar ishlatilgan. Orqa qismda ham uzluksiz chiroq bloki qo‘llanilgan. Kuzov uchun «Jinghai Sand» yangi rangi taklif etilmoqda.
Salon tekis panel dizaynida ishlab chiqilgan. Raqamli asboblar paneli va 15,6 dyuymli markaziy sensor ekran o‘rnatilgan. Rul ko‘p funksiyali bo‘lib, elektron uzatmalar selektori bilan jihozlangan. Tizim «Doubao» sun’iy intellekt bazasida ishlaydi. Ovozli boshqaruv imkoniyatlari kengaytirilgan.
Haydovchiga yordam tizimlariga avtomatik parkovka va qatordan almashtirish assistenti qo‘shildi. Ikkinchi qatorda alohida ekran mavjud. Salon Dolby ovoz tizimi bilan to‘ldirilgan.
Landian E5 Plus uzunligi 4 760 mm, kengligi 1 865 mm, balandligi 1 710 mm. G‘ildirak bazasi 2 785 mm.
Avtomobil 70 kVt quvvatga ega 1,5 litrli benzin dvigateli va 160 kVt elektromotorli gibrid tizim bilan harakatlanadi. To‘liq uzatmali tortish tizimi ishlatilgan. FSD moslashuvchan osma tizimi yo‘l sharoitiga qarab sozlanadi.
Eslatib o‘tamiz, Kursiv Uzbekistan nashri BYD Dolphin elektromobili 1 mln donadan ko‘proq sotilgani haqida yozgan edi.
