Telegram Passkey orqali profil ochishni yo‘lga qo‘ymoqda
Telegram yaqin orada parolsiz avtorizatsiya — Passkey funksiyasini ishga tushirishi mumkin. Bu haqda yangi imkoniyatni sinovdan o‘tkazayotgan Telegram Info ma’lum qildi.
Messenjerdan kirishning Beta-versiyasi (Android 12.2.8) ichida Passkey tizimining dastlabki elementlari allaqachon ko‘rinmoqda. Bu funksiya telefon raqami yoki SMS-kod kiritmasdan hisobga kirish imkonini beradi.
Eng muhimi, u Google yoki Apple ID orqali avtorizatsiyaga o‘xshamaydi. Kirish to‘liq parol boshqaruvchisi orqali amalga oshadi. Ilovaning bosh sahifasida yangi tugma — Passkey orqali kirish paydo bo‘lgan. Uni bosganingizda parol boshqaruvchisi ishga tushadi va biometriya (yuz, barmoq izi) yoki PIN orqali sizning shaxsingizni tasdiqlaydi. So‘ngra tizim Telegram’ga maxsus kirish kalitini yuboradi. Bu kalit bir vaqtning o‘zida login, parol va tasdiqlash kodining o‘rnini bosadi.
Funksiyadan foydalanish uchun avval uni Telegram’ning maxfiylik sozlamalari orqali yoqish kerak bo‘ladi. Passkey kaliti sizning telefoningizda saqlanadi, biroq Google Password Manager yoki iCloud Passwords orqali boshqa qurilmalar bilan ham sinxronlash imkoniyatiga ega bo‘ladi.
Bu nima uchun muhim
- SMS’ga bog‘liqlikni yo‘qotadi. Aloqa operatorlari SMS kodlarni to‘sib qo‘ygan holatlarda ham bemalol kirish mumkin.
- Xavfsizlik yanada yuqori. Passkey fishing orqali qo‘lga tushirilmaydi — uni qo‘lda kiritishning o‘zi mavjud emas.
- Tez va qulay kirish. Yuz yoki barmoq izi orqali bir zumda avtorizatsiya amalga oshadi. Telefonni almashtirganda ham tizim avtomatik sinxronlanadi.
Hozircha yangi funksiya to‘liq ishlamaydi, ammo Telegram uni faol ravishda ishlab chiqmoqda.
Avvalroq Kursiv Uzbekistan Pavel Durov Cocoon tarmog‘ini ishga tushirgani haqida yozgandi.
