2026-yilgi futbol bo‘yicha jahon chempionati o‘yinlariga chipta sotishning tasodifiy tanlov bosqichi boshlandi. Arizalar FIFA rasmiy platformasi orqali 2026-yil 13-yanvargacha qabul qilinadi.
Chipta sotib olish istagidagi muxlislar FIFA platformasi orqali ariza topshirishlari lozim bo‘ladi. O‘zbekiston milliy jamoasi muxlislari My Team – Uzbekistan o‘limini tanlab, o‘zbek muxlislari uchun ajratilgan sektorlar bo‘yicha chipta so‘rovi yuborishi mumkin.
Ariza topshirganlar orasida chipta egalari 2026-yil fevral oyida FIFA tomonidan tasodifiy tanlov orqali aniqlanadi. To‘lovlar arizada ko‘rsatilgan karta ma’lumotlari asosida avtomatik ravishda yechib olinadi.
Hozircha chiptalar narxi ma’lum emas. Narxlar ariza qabul qilish jarayoni yakunlangandan so‘ng, har bir o‘yinga bo‘lgan talab aniqlashtirilgach belgilanadi. Shuningdek, ishtirokchi jamoalar, o‘yin o‘tkaziladigan joy, boshlanish vaqti kabi omillar ham narxga ta’sir qiladi.
O‘zbekiston milliy jamoasi guruh bosqichi o‘yinlarini quyidagi jadval asosida o‘tkazadi:
| Sana | Vaqt | Shahar (Mamlakat) | O‘yinning tarkibi |
|---|---|---|---|
| 18-iyun | 07:00 | Mexiko (Meksika) | O‘zbekiston – Kolumbiya |
| 23-iyun | 22:00 | Hyuston (AQSh) | Portugaliya – O‘zbekiston |
| 28-iyun | 04:30 | Atlanta (AQSh) | Kongo DR / Yamayka / Yangi Kaledoniya – O‘zbekiston |
Eslatib o‘tamiz, avvalroq Donald Tramp 2026-yilgi Jahon chempionati uchun chiptaga ega sayyohlar elchixona va konsulliklarda viza suhbatiga ustuvor tartibda chaqirilishini e’lon qilgan edi.
