O‘zbekistonning Nepaldagi birinchi elchisi ishonch yorliqlarini topshirdi
O‘zbekistonning Nepaldagi birinchi elchisi Sardor Rustamboyev mamlakat Prezidenti Ramchandra Paudelga ishonch yorliqlarini topshirdi. Bu haqda «Dunyo» AA ma’lum qildi.
O‘zbekiston va Nepal o‘rtasida diplomatik munosabatlar 2018-yil 26-yanvarda o‘rnatilgan. Nepal rahbari elchining tayinlanishi uchun minnatdorlik bildirib, Toshkent bilan ko‘p qirrali aloqalarni rivojlantirishdan manfaatdor ekanini ta’kidladi.
Uchrashuv davomida tomonlar ikki tomonlama kun tartibidagi keng ko‘lamli masalalarni muhokama qildi. Savdo-iqtisodiy hamkorlikni chuqurlashtirish istiqbollariga alohida e’tibor qaratildi. Nepal tomoni gidroenergetika, turizm va ta’lim sohalarida o‘zaro aloqalarni rivojlantirish uchun salohiyat mavjudligini qayd etdi va qo‘shma loyihalarni amalga oshirishga tayyorligini bildirdi.
Ramchandra Paudel shuningdek xalqaro tashkilotlar doirasida o‘zaro manfaatli hamkorlikni rivojlantirish muhimligini qayd etdi. U global iqlim o‘zgarishi va tog‘lar ekologiyasi kabi dolzarb masalalar bo‘yicha birgalikda ishlashga bo‘lgan o‘zaro qiziqishga e’tibor qaratdi. Suhbat yakunida u Nepalning uzoq muddatli do‘stona sheriklikka sodiqligini tasdiqladi va O‘zbekiston bilan hamkorlikni mustahkamlashga qaratilgan barcha tashabbuslarni qo‘llab-quvvatlashga tayyorligini bildirdi.
Ma’lumot uchun, Sardor Rustamboyev Dehlida 2024-yil yanvar oyida o‘z faoliyatini boshlagan. Bundan oldin u O‘zbekistonning Fransiya va Portugaliyadagi diplomatik vakolatxonasiga rahbarlik qilgan. Elchi 45 yoshda bo‘lib, Birmingem universiteti (Buyuk Britaniya), Toshkent davlat sharqshunoslik universiteti, London universitetining Sharq va Afrika tadqiqotlari maktabi hamda O‘zbekiston prezidenti huzuridagi Davlat va jamiyat qurilishi akademiyasini tamomlagan. Elchi siyosiy fanlar nomzodi ilmiy darajasiga ega.
Eslatib o‘tamiz, avvalroq Sardor Rustamboyev O‘zbekistonning Bangladeshdagi elchisi sifatida mamlakat prezidentiga ishonch yorliqlarini topshirgan edi.
