Kun tarixi: Makaoning Xitoyga qatarilishi, Uels poytaxtiga aylangan Kardif va Kilian Mbappe

20-dekabr sanasi xalqaro diplomatik munosabatlar, shaharlar maqomining o‘zgarishi hamda sport va san’at yulduzlarining tug‘ilishi kabi voqealar bilan tarix sahifalaridan o‘rin olgan. Kursiv Uzbekistan kunning eng muhim voqealari taqdim etadi.

1883-yili Niagara sharsharasi joylashgan daryo uzra AQSh va Kanadani bog‘lovchi birinchi ko‘prik ishga tushirildi. Mashhur muhandis Charlz Konrad Shnayder loyihasi asosida qurilgan bu inshoot o‘sha davr texnikasining eng ilg‘or namunasi hisoblanib, asosan temir yo‘l qatnovini ta’minlash uchun xizmat qilgan. Ushbu ko‘prik mintaqadagi savdo-sotiq va transport logistikasi rivojlanishida tub burilish yasagan.

1927-yilda Janubiy Koreyaning 7-prezidenti Kim Yon Sam dunyoga keldi. U mamlakatda harbiy diktaturaga chek qo‘ygan birinchi fuqaroviy rahbar bo‘lib, davlat boshqaruvidagi korrupsiya bilan qat’iy kurashgan va iqtisodiyotni modernizatsiya qilish bo‘yicha keng ko‘lamli islohotlarni amalga oshirgan. Uning prezidentlik davrida Koreya iqtisodiy hamkorlik va taraqqiyot tashkilotiga a’zo bo‘lib kirdi.

1955-yili Kardif shahri rasman Uelsning poytaxti deb e’lon qilindi. Britaniya hukumati tomonidan qabul qilingan ushbu qaror shaharning asrlar davomida mintaqaning eng yirik iqtisodiy va madaniy markazi sifatidagi ahamiyatini davlat darajasida mustahkamladi.

1980-yilda Angliyaning eng mashhur futbolchilaridan biri Eshli Koul Londonning Stepni tumanida tavallud topdi. U «Arsenal» va «Chelsi» klublari tarkibida yetti marta Angliya kubogini qo‘lga kiritib, bu borada mutlaq rekordchi hisoblanadi, shuningdek, milliy terma jamoa tarkibida 100 dan ortiq rasmiy o‘yin o‘tkazgan.

1983-yili amerikalik taniqli aktyor, ssenarist va rejissyor Jona Xill tug‘ildi. U «Moneyball» va «Uoll-strit bo‘risi» filmlaridagi mahoratli ijrosi uchun ikki marta «Oskar» mukofotiga nomzod bo‘lgan hamda Gollivudning eng talabgir aktyorlaridan biri hisoblanadi.

1998-yilda fransiyalik hujumchi, jahon chempioni Kilian Mbappe tug‘ildi. U 19 yoshidayoq Jahon chempionati finalida gol urgan va «PSJ» klubi tarixidagi eng yaxshi to‘purarga aylangan. Hozirda dunyo futbolining eng qimmatbaho futbolchilaridan biri bo‘lib qolmoqda. Mbappe hozirda Madridning «Real» klubida to‘p suradi.

1999-yili Portugaliya Makao oroli ustidan suverenitetni Xitoy Xalq Respublikasiga topshirdi. Shu tariqa Yevropa davlatlarining Osiyodagi 442 yillik mustamlakachilik tarixiga rasman yakun yasalandi va hudud «bir davlat – ikki tizim» tamoyili asosida maxsus ma’muriy maqomga ega bo‘ldi. Makao bugungi kunda dunyoning yirik moliyaviy va ko‘ngilochar markazlaridan biri sanaladi.

2000-yilda Buyuk Britaniya parlamentining Jamoatlar palatasi inson embrionidan olingan o‘zak hujayralar yordamida klonlashni faqat tibbiy maqsadlarda amalga oshirishni ma’qulladi. Ushbu qonuniy qaror saraton, Parkinson va Altsgeymer kabi og‘ir kasalliklarni davolashda yangi ilmiy imkoniyatlar ochishi ko‘zlangan edi. Mazkur voqea fan tarixida etika va biotexnologiya chegaralari bo‘yicha eng yirik bahslardan biriga sabab bo‘ldi.

Avvalroq Kursiv Uzbekistan 19-dekabr sanasida sodir bo‘lgan muhim hodisalar haqida xabar bergan edi.