Patentlangan neon lampa, Mayamidagi ilk qor va Apple Lisa taqdimoti – kun tarixi
Bugun neon chiroqlarining patentlanishidan tortib, Hindistonda ayol rahbarning hokimiyatga kelishi va kompyuter texnologiyalaridagi yangi bosqichgacha bo‘lgan voqealarni yodga olamiz. Kursiv Uzbekistan kunning eng muhim voqealarini xronologik tartibda taqdim etadi.
1736-yili Shotlandiyalik mexanik-ixtirochi Jeyms Vatt tavallud topdi. U universal bug‘ mashinasini yaratib, Sanoat inqilobining asosiy harakatlantiruvchi kuchiga aylangan. Vatt nafaqat texnik kashfiyotlari, balki ot kuchi tushunchasini fanga kiritgani bilan ham mashhur bo‘lib, keyinchalik Xalqaro birliklar tizimidagi quvvat birligi uning sharafiga «Vatt» deb nomlangan.
1915-yili fransiyalik fizik va ixtirochi Jorj Klod neon reklama chiroqlari uchun AQSh patentini qo‘lga kiritdi. «Fransuz Edisoni» deb nom qozongan Klod elektr zaryadi yordamida inert gazlarning yorug‘lik taratish xususiyatini kashf etib, zamonaviy tashqi reklama sanoati va tungi shahar yoritish tizimlariga asos solgan edi.
1966-yilda Indira Gandi Hindiston bosh vaziri lavozimini egalladi va mamlakat tarixidagi birinchi ayol hukumat rahbariga aylandi. Mustaqil Hindistonning birinchi bosh vaziri Javoharla’l Neruning qizi bo‘lgan «Temir xonim» mamlakatni turli davrlarda jami 15 yil davomida boshqarib, qishloq xo‘jaligi va sanoatni rivojlantirishga katta hissa qo‘shgan.
1977-yili AQShning Florida shtati, xususan, Mayami shahrida meteorologik kuzatuvlar tarixidagi noyob hodisa — qor yog‘ishi kuzatildi. Subtropik iqlim mintaqasida joylashgan va qishi iliq o‘tadigan ushbu hududda haroratning keskin pasayishi mahalliy qishloq xo‘jaligiga, ayniqsa, sitrus mevalar hosiliga jiddiy zarar yetkazgan.
1980-yilda ispaniyalik futbol afsonasi Xavi (Xavyer Ernandes) dunyoga keldi. «Barselona» klubi va Ispaniya terma jamoasining yarim himoyachisi sifatida tanilgan Xavi maydonda to‘p nazoratiga asoslangan «tiki-taka» o‘yin uslubining asosiy ijrochilaridan biri bo‘lib, faoliyati davomida Jahon va ikki karra Yevropa chempionligini qo‘lga kiritgan.
1980-yili yana bir sport yulduzi, britaniyalik Formula-1 poygachisi Jenson Batton tavallud topdi. U 2009-yilda «Brawn GP» jamoasi tarkibida jahon chempioni unvoniga sazovor bo‘lgan. Batton o‘zining uzoq yillik faoliyati davomida 300 dan ortiq Gran-prida ishtirok etib, avtosport tarixidagi eng tajribali poygachilardan biri sifatida e’tirof etiladi.
1983-yilda Apple kompaniyasi o‘zining inqilobiy mahsuloti — «Lisa» shaxsiy kompyuterini taqdim etdi. Bu grafik foydalanuvchi interfeysi (GUI) va sichqoncha (mouse) bilan jihozlangan birinchi ommaviy kompyuterlardan biri edi. Garchi $9 995 narxi tufayli tijoriy muvaffaqiyatga erishmagan bo‘lsa-da, «Lisa» kelajakdagi Macintosh kompyuterlari uchun texnologik poydevor vazifasini o‘tadi.
2007-yili taniqli estrada xonandasi va bastakor Murod Nosirov 37 yoshida Moskvada fojiali tarzda vafot etdi. Asli kelib chiqishi uyg‘ur bo‘lgan san’atkor «Мальчик хочет в Тамбов» va «Я это ты» xitlari orqali MDH mamlakatlarida mashhurlikka erishgan va o‘zining lirik qo‘shiqlari bilan millionlab tinglovchilar xotirasida chuqur iz qoldirgan edi.
Avvalroq Kursiv Uzbekistan 18-yanvar sanasida sodir bo‘lgan muhim hodisalar haqida xabar bergan edi.
