Xitoyda Volkswagen va SAIC hamkorligida yaratilgan Volkswagen ID. Era 9X to‘liq o‘lchamli EREV krossoverining interyeri suratlari tarqaldi. Rasmiy taqdimot arafasida e’lon qilingan kadrlar salonning minimalistik uslubda ekanini ko‘rsatadi.
Salon markazida yirik sensorli ekran joylashtirilgan. U haydovchi uchun asboblar paneli, old yo‘lovchi uchun esa ko‘ngilochar monitor vazifasini bajaradi. Markaziy tunnelda jismoniy tugmalar deyarli yo‘q. Asosiy funksiyalar sensor ekran yoki ovozli buyruqlar orqali boshqariladi. Uzatma tutqichi rul ortiga ko‘chirilgan. Simsiz zaryadlash maydoni va keng saqlash bo‘limlari ham bor.
ID. Era 9X ichki joylashuvi 2+2+2 sxemasida, olti o‘rindiqli. Bu Xitoy bozoridagi ko‘plab yirik yangi energiya krossoverlari uchun odatiy yechim hisoblanadi.
Model o‘lchamlari 5207×1997×1810 mm. G‘ildirak bazasi 3070 mm. Taqqoslash uchun, u BMW X7dan 27 mm uzun, 3 mm tor va 25 mm past. Avtomobil 20 yoki 21 dyuymli disklar bilan taklif etiladi. Dizaynda ingichka kunduzgi chiroqlar, faol radiator panjarasi va yashirin eshik tutqichlari bor.
Texnik qismda 1,5 litrli turbomotor generator sifatida ishlaydi. Bazaviy versiyada orqa o‘qda 220 kVtli elektromotor bo‘ladi. Batareya 51,1 yoki 65,2 kVt·soat variantlarda taklif etiladi. To‘liq yetakli versiya ikki elektromotor bilan 380 kVt quvvatga ega. Elektr rejimida yurish masofasi 340 kmgacha yetadi.
Eslatib o‘tamiz, Kursiv Uzbekistan nashri Volkswagen Magotan gibrid modeli rasman tasdiqlangani haqida yozgan edi.
