BYD’ning ultra-lyuks elektromobillar yo‘nalishidagi Yangwang subbrendi 2026-yil uchun Yangwang U7 sedanining yangilangan versiyasi tafsilotlarini taqdim etdi. Bu haqda Bike-ev nashri xabar berdi.
Yangi model 150 kVt·soat sig‘imli LFP Blade batareya bilan jihozlanib, CLTC sikli bo‘yicha 1 ming kilometrgacha yurish masofasini taklif qilmoqda. Bu ko‘rsatkich U7’ni BYD’ning eng uzoq masofaga yuradigan sof elektr avtomobiliga aylantiradi.
Yangilanish natijasida avtomobil og‘irligi taxminan 100 kilogrammga oshgan, biroq energiya samaradorligi aksincha yaxshilangan. Endi elektromobil 100 km masofada 17,7 kVt·soat energiya sarflaydi, bu avvalgi modelga nisbatan qariyb 10 foizga tejamkor degani.
Lyuks va quvvat uyg‘unligi
Yangwang U7 2024-yilda taqdim etilgan bo‘lib, BYD’ning 1 million yuandan yuqori segmentni nishonga olgan premium brendi hisoblanadi. U7 Xitoyda 628 ming yuandan (taxminan $89,8 ming) boshlanadi.
Sedan e4 platformasi asosida qurilgan bo‘lib, har bir g‘ildirak uchun alohida elektromotor (IWD) bilan jihozlangan. To‘liq elektr versiya 1 287 ot kuchi (960 kVt) quvvatga ega bo‘lib, yuqori konfiguratsiyada bu ko‘rsatkich 1 341 ot kuchigacha yetadi. 0 dan 100 km/soatgacha tezlanish atigi 2,9 soniya, maksimal tezlik esa 270 km/soatni tashkil etadi.
Texnologiya va qulayliklar
Yangwang U7 aerodinamik ko‘rsatkichlari bilan ham ajralib turadi. Havo qarshiligi koeffitsiyenti – 0,195 Cd. Avtomobil DiSus-Z faol osma tizimi, to‘liq boshqariladigan orqa g‘ildiraklar va energiyani qayta tiklovchi shassi texnologiyalariga ega.
Salonida esa 23,6 dyuymli raqamli panel, AR-HUD, 12,8 dyuymli OLED markaziy ekran, premium Nappa charm, haqiqiy yog‘och bezaklar hamda 23 karnayli Dynaudio audio tizimi mavjud. Haydovchiga yordamchi tizimlar God’s Eye A (DiPilot 600) majmuasiga birlashtirilgan bo‘lib, LiDAR, radar va kameralar orqali L2+ darajadagi avtopilotni taklif qiladi.
Yangilangan U7 import lyuks sedanlari – Mercedes-Benz S-Class, BMW 7 Series va EQS kabi modellarga jiddiy raqobatchi sifatida ko‘rilmoqda. 150 kVt·soatli batareya va 1 000 km dan ortiq yurish masofasi Xitoy bozorida yuqori martabali mijozlar uchun masofa xavotirini deyarli yo‘qqa chiqaradi.
Avvalroq Kursiv Uzbekistan Volkswagen yangi Sagitar S sedanini taqdim etgani haqida yozgandi.
